Astanada Qazaqstan men Reseıdiń máńgilik dostyq alleıasy ashyldy
ASTANA. KAZINFORM – 28 mamyrynda Astana qalasynda Qazaqstan men Reseı arasyndaǵy tarıhı jáne mádenı baılanystardyń, odaqtastyq pen tatý kórshiliktiń sımvolyna aınalǵan Máńgilik dostyq alleıasynyń saltanatty ashylý rásimi ótti. Bul týraly Mádenıet jáne aqparat mınıstrliginiń baspasóz qyzmeti habarlady.
Jańa mádenı nysan — eki el arasyndaǵy kópjyldyq yntymaqtastyq pen senimniń, sondaı-aq Qasym-Jomart Toqaev pen Vladımır Pýtın arasyndaǵy dostyq qarym-qatynas pen ózara qurmettiń jemisi.
Alleıanyń ashylý rásimine Mádenıet jáne aqparat mınıstri Aıda Balaeva men Reseı Federatsııasynyń Mádenıet mınıstri Olga Lıýbımova bastaǵan reseılik delegatsııa qatysty.
Іs-shara barysynda Aıda Balaeva eki el arasyndaǵy qarym-qatynasta mádenı yntymaqtastyqtyń orny erekshe ekenin atap ótti. Onyń aıtýynsha, qos tarap birlesken kórmeler uıymdastyryp, shyǵarmashylyq ujymdardyń gastrolderin, kınofestıvalder ótkizýde, sondaı-aq Mádenı-gýmanıtarlyq yntymaqtastyq jónindegi kishi komıssııa jemisti jumys istep keledi.
Sońǵy jyldardaǵy mańyzdy oqıǵalar qatarynda — eki eldiń mádenı kúnderin, Qazaqstanda «Orys maýsymdary» mádenı-gýmanıtarlyq jobasyn jáne «Aýqymdy gastrolder» baǵdarlamasy sátti júzege asyp keledi.
— Mádenıet árqashan halyqtardy jaqyndastyratyn kópir bolyp keledi. Óner, til, dástúr men mýzyka arqyly biz bir-birimizdi tereńirek tanımyz, ereksheligimizdi túsinýge ári qurmetteýge úırenemiz, ortaq qundylyqtardy tabamyz. Sondyqtan da Máńgilik dostyq alleıasy — halyqtarymyzdyń rýhanı birliginiń, ortaq tarıh pen keleshekke baǵyttalǵan yntymaqtastyqtyń aıqyn belgisi. Bul oryn bolashaqta birlesken mádenı jobalar júzege asatyn, sýretshiler, mýzykanttar, akterler, tarıhshylar men jas talanttar bas qosatyn alańǵa aınalaryna senemin. Alleıa — urpaqtan-urpaqqa jalǵasar senim men qurmet, ortaq qundylyqtardy saqtaý qajettigin eske salyp turatyn sımvol, — dedi Aıda Balaeva.
Reseı Mádenıet mınıstri Olga Lıýbımova eki el arasyndaǵy mádenı baılanystardy nyǵaıtýǵa nıetti ekenin jetkizdi.
— Dostyq alleıasyn ashý qurmeti eki eldiń mádenıet mınıstrligine berilip otyr. Mádenı baılanystar, ortaq qundylyqtar men tarıh — halyqtar dostyǵynyń berik tiregi ekeni sózsiz, — dep atap ótti Olga Lıýbımova.
Sonymen qatar «Mádenı dıalog: Qazaqstan — Reseı» atty dóńgelek ústel uıymdastyryldy. Oǵan qos eldiń shyǵarmashylyq jáne ǵylymı zııaly qaýym ókilderi qatysty. Jıyn barysynda teatr óneri, mýzeı isi, kitaphana salasy, kınematografııa jáne mádenı bilim berý baǵyttaryndaǵy birlesken jobalardy damytý perspektıvalary talqylandy.
Atalmysh mádenı is-sharalar eki el ónerpazdary qoıǵan kontsertpen túıindeldi. «Astana Opera» teatrynda Qazaqstan men Reseıdiń mádenıet qaıratkerleri, halyqaralyq baıqaýlardyń laýreattary, akademııalyq óner juldyzdary óner kórsetti.
Aıta ketelik Astanada Jeńistiń 80 jyldyǵyna oraı «Dańq alleıasyna» aǵash otyrǵyzylǵan edi.