Astanada Qazaqstan men Perý saıası konsýltatsııalary ótti
ASTANA. QazAqparat - Syrtqy ister mınıstrliginde qazaqstan-perý saıası konsýltatsııalary ótti, dep habarlaıdy QazAqparat QR SІM baspasóz qyzmetine silteme jasap.
Taraptar 2017 jylǵy qarashada Lıma qalasynda qol qoıylǵan QR SІM men Perý SІM arasyndaǵy saıası konsýltatsııalardyń tetigin ornatý jónindegi ózara túsinistik týraly Memorandýmǵa sáıkes eki eldiń saıası vedomstvolarynyń arasyndaǵy yntymaqtastyqty nyǵaıtýdy jáne dıalogtyń damýyn qoldady.
Konsýltatsııa barysynda eki jaqty jáne kóp jaqty áriptestik talqylandy. Atap aıtqanda, Qazaqstan men Perý arasyndaǵy yntymaqtastyqtyń shart-quqyqtyq bazasyn keńeıtý, vızalyq rejimdi jeńildetý, saýda-ekonomıkalyq qatynastardy, bilim jáne mádenı-gýmanıtarlyq baılanystardy belsendetý.
Perý Syrtqy ister mınıstrliginiń Azııa jáne Okeanııa isteri jónindegi Bas dırektory Elard Eskala Perýdiń Qazaqstanmen áriptestiginiń mańyzdylyǵyn atap ótip, Astana Perý úshin Ortalyq Azııa óńirimen qatynastardy jyljytýǵa hab bolatyndyǵyna úmit bildirdi.
Saýda-ekonomıkalyq qatynastardyń jandandyrý maqsatynda QR Syrtqy ister mınıstrligi Amerıka departamentiniń dırektory Bolat Súgirbaev eki eldiń bıznes qoǵamdastyqtar ókilderiniń arasyndaǵy áriptestigin iskerlik mıssııalarmen almasý arqyly jandandyrýǵa shaqyrdy. Sondaı-aq Eýrazııalyq ekonomıkalyq odaq pen Tynyq muhıt alıansy aımaqtyq saýda bloktary arasyndaǵy baılanystardy damytýdyń keleshegi atalyp ótildi.
Konsýltatsııalar barysynda «Qazaqstan ǵarysh sapary» UK» AQ men Perý Ǵarysh agenttiginiń arasynda jáne QR Prezıdentiniń janyndaǵy Memlekettik basqarý akademııasy men Perýdiń Dıplomatııalyq akademııasy arasynda ózara túsinistik týraly memorandýmdarǵa qol qoıyldy.
Kezdesýdiń qorytyndysy boıynsha taraptar qazaqstan-perý saıası konsýltatsııalardyń kezekti otyrysyn 2019 jyly Lıma qalasynda ótkizýge kelisti.
