Astanada Qazaqstan men Qytaı medıa-sımpozıýmy ótti
ASTANA. QazAqparat - Búgin Astanada Qazaqstan-Qytaı buqaralyq aqparat quraldary ókilderiniń qatysýymen medıa-sımpozıým bolyp ótti. Kezdesýdiń basty taqyryby kórshiles eki eldiń BAQ salasyndaǵy yntymaqtastyǵyn nyǵaıtý, dástúrli dostyqty tereńdetý baǵytyndaǵy pikir almasý boldy, dep habarlaıdy QazAqparat.
Jıyndy ashyp sóz sóılegen Qytaı Aqparattyq ınternet-ortalyǵynyń bas redaktory Van Sıaohýeı eki eldiń arasyndaǵy yntymaqtastyqty damytý, dástúrli dostyqty tereńdetýde BAQ róli erekshe joǵary ekenine nazar aýdardy. Sonymen qatar, spıker jaqyn kúnderi resmı ashylatyn «EKSPO-2017» halyqaralyq kórmesi men ShYU basshylarynyń kezdesýiniń mańyzyna toqtala kele, onyń aıasynda medıa ókilderiniń pikir almasýy ózekti ekenin jetkizdi. Budan bólek, onyń aıtýynsha, Jibek joly ekonomıkalyq beldeýiniń ekonomıkalyq aspektilerinen bólek, onyń mádenı-gýmanıtarlyq qyrlaryn aqparattyq baǵytta qoldaý eki elge de paıdaly.
«Bir beldeý - bir jol» - gúldenýdiń, ashyqtyqtyń, beıbitshilik pen damýdyń, ınnovatsııa men órkenıettiń joly. Bul jol ártúrli el halyqtarynyń damý múddelerine saı keletin perspektıvasy joǵary baǵyt. Sondyqtan da, ejelden kórshiles elderdiń baspasózi de bul baǵyttaǵy yntymaqtastyǵyn arttyrsa, utatyny sózsiz», - dedi Van Sıaohýeı.
Al Qytaı Kommýnıstik partııasy OK nasıhat bólimi mınıstriniń orynbasary To Chjen «Bir beldeý - bir jol» bastamasy Qazaqstan men Qytaı ıntegratsııasyn jańa satyǵa jeteleıtinin atap ótti.
«Bul eki el halyqtarynyń múddesi úshin jasalatyn mańyzdy qadam. Sondyqtan da, jarqyn bolashaq maqsatynda Prezıdent Nursultan Nazarbaev Jibek joly beldeýin «Nurly jol» baǵdarlamasymen ushtastyrýdy alǵa tartty. Al bizdiń maqsatymyz elderdiń iskerlik, ekonomıkalyq yntymaqtastyǵyn durys dáriptep, aıshyqty kórsetý», - dedi To Chjen. 
Júzdesý barysynda qytaılyq BAQ basshylary qazaqstandyq áriptesterimen aqparattar almasý, ártúrli baǵytta birlesken jobalardy júzege asyrý týraly usynystar jasady. Jýrnalıstıka salasynda mamandar oqytý men tájirıbe almasý týrasynda sóz boldy.
Óz kezeginde «Qazaqstan» RTRK Basqarma tóraǵasy Erlan Qarın Qazaqstan men Qytaıdyń asa jaqyn elder ekenin, bul rette aqparat quraldarynyń memelketaralyq qarym qatynastardy damytýdaǵy róli óte joǵary ekenin atap ótti.
«EKSPO-2017» Halyqaralyq kórmesi qarsańynda uıymdastyrylyp otyrǵan forýmnyń óz ereksheligi bar. Bul eń birinshi kezekte qytaılyq áriptesterimizdiń Astanadaǵy aıtýly sharaǵa qoldaýyn bildiredi. Ekinshiden, 2013 jyldyń kúzinde Astanada Qytaı Tóraǵasy Sı Tszınpın Jibek joly ekonomıkalyq beldeýin jarııa etkeni belgili. Tarıhı málimdemeniń bizdiń elimizde jarııalaı otyryp, jańa ekonomıkalyq damýdyń tujyrymdamasyn ǵana emes, halyqaralyq yntymaqtastyqtyń jańa qaǵıdattaryn áıgiledi. Bundaı aýqymdy baǵdarlamada BAQ-tyń da alatyn orny bar»,- dedi E. Qarın.
Onyń aıtýynsha, Qazaqstan Qytaıdyń Jibek joly beldeýine úılestirý baǵytynda «Nurly jol» baǵdarlamasyn qabyldaǵan birden bir el. «Sondyqtan da, Qazaqstan men Qytaı «Bir beldeý-bir jol» jobasyn júzege asyrýda negizgi seriktester bola alady. Al ekonomıkalyq yntymaqtastyqty mádenı-gýmanıtarlyq baǵytta qoldaý erekshe mańyzdy. Bul rette BAQ eki el halqynyń dostyq jáne ózara túsinistik kópiri bola alady», - dedi ol.
Al «QazAqparat» HAA Bas dırektory Asqar Omarov ejelden kórshi eki eldiń dostyǵy BAQ aıasyndaǵy yntymaqtastyq arqyly bekı túsetinin jetkizdi.
«Elbasynyń tapsyrmasy aıasynda «QazAqparat» agenttiginde ashylǵan Qytaı redaktsııasynyń jumysy buǵan dálel bola alady. Ortalyq Azııada birinshi bolyp ashylǵan qytaı tilinde habar taratý eki el halyqtarynyń mádenı-gýmanıtarlyq ıntegratsııasyna óz áserin tıgizip keledi. Biz qytaılyq áriptesterimizben birlese otyryp, osy baǵyttaǵy jumystardy tereńdetýge, aýqymyn arttyrýǵa múddelimiz», - dedi A. Omarov.
Pikir almasý formatynda ótken jıynǵa qatysýshylar mundaı basqosýdyń mańyzdylyǵyna nazar buryp, kezdesýdi dástúrli túrde merzim saıyn ótkizý týraly usynystar tastady.
