Astanada Qazaqstan men HAK-tyń avıatsııalyq saladaǵy yntymaqtastyǵy talqylandy
ASTANA. QazAqparat - Búgin Úkimet úıinde Qazaqstan Respýblıkasynyń Premer-Mınıstri Baqytjan Saǵyntaev Halyqaralyq avıatsııa komıtetiniń (HAK) tóraıymy Tatıana Anodınamen kezdesý ótkizdi. Bul týraly primeminister.kz saıty habarlady.
Kezdesý barysynda HAK-pen avıatsııa salasyndaǵy yntymaqtastyq keleshegi talqylandy.
Aıta keteıik, bıyl qyrkúıekte Eýropalyq komıssııa Qazaqstandaǵy ushyp-qoný qaýipsizdigimen qamtamasyz etýdiń tehnıkalyq baǵalaý jumystaryn júrgizdi. Nátıjesi boıynsha, Qazaqstan Halyqaralyq azamattyq avıatsııa uıymynyń (IKAO) standarttaryn tıimdi engizýdegi óz deńgeıin dáleldedi jáne Eýropalyq komıssııanyń 2016 jylǵy 8 jeltoqsandaǵy sheshimimen, otandyq áýe kompanııalarynan Eýropalyq odaqqa ushýǵa qoıylǵan shekteýler alynyp tastaldy.
Qazaqstan 2020 jylǵa deıin IKAO standarttaryn engizý boıynsha 87%-dan joǵary kórsetkishke jetýdi jáne álemniń úzdik 30 avıatsııalyq ákimshilikteriniń qataryna kirýdi josparlaıdy.
