Astanada Qazaqstan men Gondýras yntymaqtastyǵy máseleleri talqylandy
ASTANA. QAZAQPARAT - Qazaqstan Respýblıkasynyń syrtqy ister mınıstri Qaırat Ábdirahmanov Gondýras Respýblıkasynyń syrtqy ister jáne halyqaralyq yntymaqtastyq mınıstri Marııa Dolores Agýeromen kezdesti. Bul issapar eki jaqty qarym-qatynastar tarıhynda osy memlekettiń Astanadaǵy syrtqy saıası keńsesi basshysynyń alǵash ret kelýi boldy, dep habarlaıdy QR SІM baspasóz qyzmeti.
Kezdesýde taraptar SІM jelisi boıynsha Qazaqstan jáne Gondýras arasyndaǵy saıası dıalogty damytýǵa nıetti ekenin bildirdi. Sondaı-aq ekijaqty qarym-qatynastardyń, sonyń ishinde saýda jáne týrızm salalarynyń bolashaǵy zor baǵyttaryn anyqtaý qajettigi aıtyldy.
Taraptar halyqaralyq qatynastar jáne aımaqtyq qaýipsizdiktiń ózekti máseleleri boıynsha pikir almasty. Halyqaralyq qatynastar boıynsha eki eldiń ustanymdary uqsas ekendigi sóz bolyp, qazirgi baılanystardy BUU aıasynda jandandyrý qajettigi tilge tıek etildi. Sonymen qatar, Gondýras BUU Qaýipsizdik Keńesine 2022-2023 jyldary múshe bolýǵa nıet tanytqan bolatyn.
Q. Ábdirahmanov Qazaqstannyń Latyn Amerıkasy men Karıb basseınindegi Amerıka memleketteri uıymy, Karıb memleketteri qaýymdastyǵy, Karıb qoǵamdastyǵy sııaqty aımaqtyq yntymaqtastyq alańdarymen ornatqan baılanystary jóninde aıtty. Atalǵan uıymdarmen qatar Gondýras múshe bolyp otyrǵan Ortalyqamerıkalyq ıntegratsııa júıesiniń qyzmetin erekshe atap ótýge bolady. Uıymnyń negizgi maqsaty - ortaq naryq qalyptastyrý arqyly erkin saýda aımaǵyn qurý bolyp tabylady.
Gondýras syrtqy saıası keńsesiniń basshysy ókildik delegatsııamen birge Ortalyq Amerıka eliniń Astanadaǵy «EKSPO-2017» kórmesindegi Ulttyq kúni saltanattaryna qatysty. Gondýrastyń kórmedegi pavılonynda osy eldiń ónerpazdary ónerlerin kórsetti.
