Astanada Qazaqstan men Ázerbaıjannyń joǵary aýdıt organdary basshylary kezdesti
ASTANA. KAZINFORM — Astanaǵa Ázerbaıjan Esep palatasynyń tóraǵasy Vıýgar Gıýlmamedov bastaǵan resmı delegatsııa keldi. Olar Qazaqstannyń Joǵary aýdıtorlyq palatasynyń ókilderimen birlesken is-sharalarǵa qatysady. Bul týraly palatanyń baspasóz qyzmeti málim etti.
Jumys sapary 2024-2026 jyldarǵa arnalǵan eki vedomstvonyń yntymaqtastyǵyn kúsheıtý jónindegi is-sharalar josparyn júzege asyrý sheńberinde ótip jatyr. Birinshi kezekte Qazaqstan men Ázerbaıjannyń memlekettik aýdıtorlarymen semınar ótti.
Ekologııa salasynda tıimdilik aýdıtin júrgizýdiń ádistemelik tásilderi, bıýdjettiń atqarylýy týraly qorytyndylar daıyndaý, sondaı-aq shoǵyrlandyrylǵan qarjylyq eseptilikke aýdıt júrgizý sııaqty taqyryptar talqylandy. Vedomstvo basshylarynyń qatysýymen ótken eki delegatsııanyń resmı kezdesýi barysynda aldaǵy ýaqyttaǵy birlesken jumystyń perspektıvaly baǵyttary qaraldy.
Joǵary aýdıtorlyq palatanyń tóraǵasy Álıhan Smaıylov yntymaqtastyqty damytý úshin eki memlekettiń joǵary aýdıt organdarynyń aıtarlyqtaı áleýeti bar ekenin atap ótti. Ol elimizde memlekettik aýdıt júıesin reformalaý jalǵasyp jatqanyn jáneJoǵary aýdıtorlyq palata úshin ázerbaıjandyq áriptestermen tájirıbe men bilim almasý óte mańyzdy ekenin atap ótti. Tsıfrlandyrý, ozyq AT-sheshimder engizý, jasandy ıntellekt pen aýqymdy derekterdi paıdalaný bul jumystyń negizgi baǵyttary bolyp otyr.
— Biz Ázerbaıjan Esep palatasymen uzaq jyldar boıy jalǵasyp kele jatqan dostyq qarym-qatynasty joǵary baǵalaımyz. Bizdiń birlesken kúsh-jigerimiz eki eldiń memlekettik basqarý júıesin odan ári damytýǵa yqpal etedi dep úmittenemiz, — dedi Joǵary aýdıtorlyq palatanyń tóraǵasy.
Óz tarapynan Vıýgar Gıýlmamedov Ázerbaıjan men Qazaqstan halyqtary arasyndaǵy qarym-qatynastyń tarıhy tereńde jatqanyn atap ótti. Onyń aıtýynsha, eki elde memlekettik qarjylyq baqylaýdyń qaǵıdattary men ádisteri, sondaı-aq baqylaý organdarynyń qurylymy uqsas.
— Bul tájirıbe almasý úshin jaqsy negiz jáne bizdiń ulttyq júıelerimizdi jetildirýge yqpal etedi, — dedi Vıýgar Gıýlmamedov.
11 qyrkúıekte eki eldiń memlekettik aýdıtorlarynyń qatysýymen ekologııa salasyndaǵy qatarlas aýdıt qorytyndysyna arnalǵan otyrys ótedi. Onyń maqsaty — Qazaqstan men Ázerbaıjannyń joǵary aýdıt organdary arasyndaǵy áriptestikti nyǵaıtý, sondaı-aq eki memlekette de ekologııalyq aýdıttiń sapasyn arttyrý. Aýdıt taqyryby — bıologııalyq áralýandyqty saqtaý.
Buǵan deıin habarlanǵandaı, Prezıdent Jarlyǵymen Joǵary aýdıtorlyq palatanyń quzyreti keńeıtildi.