Astanada Qazaqstan, Qytaı, Mońǵolııa, Reseı sýretshileriniń baıqaýy ótti
Áskerı taqyrypta ótken baıqaýǵa Astana, Almaty, Kókshetaý, Qyzylorda qalalarynan jáne Qytaı Halyq respýblıkasy, Mońǵolııa, Reseı elderinen sýretshiler qatysty.
Kórme Uly Jeńistiń 67 jyldyǵy men L.N.Gýmılevtiń 100 jyldyǵyna oraılastyra uıymdastyrylyp otyrǵan qomaqty mádenı shara. Ádilqazylardyń qaraýyna 67 týyndy usynyldy. Eń úzdik shyǵarmalardyń avtorlary búgin Uly Otan soǵysy ardagerleriniń qatysýymen ótken saltanatty jıynda marapattaldy.
Tarıh ǵylymdarynyń doktory, professor Zııabek Qabyldınovtyń aıtýynsha, mundaı sharalar Keńes Odaǵy tusynda jıi ótkizilip turatyn.
«Bul ıgi dástúr búginde qaıtadan jandanyp keledi. Kórme soǵys otyna kúıip, oqqa ushqan jaýyngerlerdiń rýhyna taǵzym etý jáne ardagerlerge qurmet kórsetý úshin uıymdastyryldy. Olar bizdiń ortaq Otanymyzdy qorǵap qaldy jáne erliktiń, batyrlyqtyń, jaýkeshtiliktiń naǵyz úlgisin tanytty», - deıdi Z. Qabyldınov.
Kórmege Uly Otan soǵysynan qalǵan qarý-jaraq, maıdannan kelgen hattar syndy tarıhı jádigerler qoıylǵan. Sonymen qatar jurtshylyq nazaryna soǵys alańynda ótken oqıǵalar men áskerı qımyldar tarıhyn baıandaıtyn foto shejire usynylǵan.
Kórme-baıqaý Otan soǵysy múgedekterine arnalǵan ortalyq klınıkalyq gospıtal ǵımaratynda ótti.
