Astana aspanynda Qarýly kúshterdiń ıstrebıtelderi ushady

ASTANA. KAZINFORM – 23-24 qarasha kúnderi Astanada Qazaqstan Qarýly kúshteri avıatsııasynyń josparly ushýlary ótedi. Bul týraly Qorǵanys mınıstrligi habarlady.

«2024 jylǵy 23-24 qarasha kúnderi Astana qalasynan Qazaqstan Qarýly kúshteri avıatsııasynyń josparly ushýlary ótedi. Atalǵan is-shara arnaıy tútindi paıdalaný arqyly Qazaqstan Respýblıkasy Áýe qorǵanysy kúshteriniń oqý-jattyǵý ushýlary sheńberinde ótkizilmek. Avıatsııanyń ushýy qaýipsiz bıiktikte ótetindikten, qala ómiriniń ádettegi qalpyn buzbaıdy. Іs-shara ushý qaýipsizdigi sharalaryna sáıkes uıymdastyrylatyndyqtan, turǵyndarǵa eshqandaı qaýip tóndirmeıdi. Qoldanylatyn túrli-tústi tútinderdiń ekologııalyq zııany joq», - delingen habarlamada.

Eske salsaq, Memleket basshysy Ýkraınadaǵy ahýaldyń ýshyǵýyna baılanysty elimizdegi tıisti qurylymdarǵa shuǵyl sharalar qabyldaýdy tapsyrdy.

Sonymen qatar Premer-mınıstr Oljas Bektenov  qorǵanys, ishki ister, tótenshe jaǵdaılar, syrtqy ister, densaýlyq saqtaý, kólik, energetıka, ónerkásip jáne qurylys, ulttyq ekonomıka, qarjy mınıstrlikteriniń basshylyǵymen Memleket basshysynyń negizgi áskerı jáne azamattyq obektilerdiń qaýipsizdigin qamtamasyz etý jóninde shuǵyl sharalar qabyldaý týraly tapsyrmalaryn oryndaý jóninde jedel keńes ótkizdi.