Astanada Qazaqstan halqynyń birligi kúni keń kólemde atalyp ótýde
ASTANA. 1 mamyr. QazAqparat - Búgin Astanadaǵy «Qazaq eli» monýmentiniń alańynda Qazaqstan halqynyń birligi kúni qyzý toılanyp jatyr. Alań aýmaǵynda azamattarǵa kópshilik serýeni úshin arnaıy jaǵdaı jasalǵan.
Ol kúni boıyna 100 myńǵa deıin adam qabyldaı alady. Ólshemi 10m H 10 m bolatyn 10 shatyrdan turatyn qalashyq salynǵan. Olardyń árqaısysynda 2-3 etnomádenı birlestikter ornalasyp, óz ulystarynyń sándik-qoldanbaly ónerin, ulttyq kıimderin, mýzykalyq aspaptaryn, turmystyq jáne qolóner buıymdaryn kórsetedi.
Sondaı-aq, azyq-túlik bólshek saýdasyna arnalyp 20 saýda shatyry tigilgen. Sonymen qatar, qala meıramhanalary tamaqtanýdy uıymdastyrýy úshin dıametri 20, 16 jáne 12 metr bolatyn 5 oryn bar. Olardyń birinde túrli etnostardyń ulttyq taǵamdary tanystyrylady.
Aıta ketý kerek, «Qazaq eli» monýmenti alańyndaǵy is-sharalarmen qosa, qalanyń dástúrli oryndarynda da merekelik sharalar ótýde. Bıylǵy 15 sáýir men 2 mamyr aralyǵynda 27 is-shara uıymdastyrylǵan. Onyń ishinde Qazaqstan halqynyń birligi festıvali, kórmeler, dóńgelek ústelder, sporttyq jarystar, qalalyq sýret baıqaýy, jastar fleshmoby, mektepterde synyp saǵattary ótkizildi.
