Astanada Qazaqstan halqynyń birligi kúnine oraı qandaı is-sharalar ótedi
ASTANA. KAZINFORM — Astana turǵyndary men qonaqtaryna arnap festıvalder, kontsertter, jármeńkeler, sporttyq jáne otbasylyq is-sharalar ótedi. Barlyǵy 60-qa jýyq is-shara josparlanyp otyr, dep habarlaıdy qala ákimdiginiń resmı saıty.
Negizgi merekelik is-sharalar 1 mamyr kúni ótedi. Bul kúni Dostyq úıi alańynda «Qazaqstan — birlik mekeni» festıvali uıymdastyrylady. Qonaqtarǵa ulttyq taǵamdar, qolóner kórmeleri, sheberlik saǵattary men kontserttik baǵdarlama usynylady.
Qalanyń birneshe tanymal oryndarynda kontserttik baǵdarlamalar ótedi:
- «Jetisý» saıabaǵynda,
- Esil ózeni jaǵalaýyndaǵy Arbat aýmaǵynda,
- «Jastar» saraıynda.
Saǵat 12:00–de Qalalyq alańda Ázirbaıjan Mámbetov atyndaǵy memlekettik drama jáne komedııa teatry ártisteriniń qatysýymen merekelik kontsert ótedi.
Sportsúıer qaýym úshin Trıatlon parkinde jazǵy maýsymnyń ashylýy ótedi. Baǵdarlamada 5 shaqyrymdyq jappaı júgirý, 400 metrlik balalar jarysy, skandınavııalyq júris, sondaı-aq fýtbol, voleıbol jáne basketbol (5×5) sport túrlerinen komandalyq týrnırler bar.
Sonymen qatar, ashyq jattyǵýlar (ıoga, street workout, jekpe-jek óneri) men jeke kúsh synasý jarystary uıymdastyrylady.
Bul kúni «Jeruıyq» saıabaǵynda ulttyq sport túrlerinen jarystar, al «Jaǵalaý-3» turǵyn úı kesheninde shahmat týrnıri ótedi.
Mereke qarsańynda, ıaǵnı 30 sáýir kúni elordada birqatar mańyzdy is-shara uıymdastyrylady. Olardyń biri — Ál-Farabı atyndaǵy Oqýshylar saraıynda ótetin «Dostyq kerýeni» etnofestıvali. Baǵdarlama aıasynda etnografııalyq kórmeler, ulttyq qolónerden sheberlik saǵattary, dostyq sherýi jáne kontsert uıymdastyrylady.
Baıqońyr aýdanynda «Halyq qatysatyn bıýdjet» baǵdarlamasy aıasynda abattandyrylǵan jańa aýlalar ashylady. Munda turǵyndardyń qatysýymen «Aýla kúni» formatyndaǵy merekelik is-shara uıymdastyrylady.
30 sáýir kúni EKSPO aýmaǵynda memlekettik týmen patrıottyq aktsııa ótedi. Іs-sharaǵa jastar men etnomádenı birlestikter qatysyp, ulttyq birliktiń mańyzyn dáripteıdi.
Sol kúni Saraıshyq aýdanynda «Taza Qazaqstan» ekoaktsııasy aıasynda ekologııalyq is-shara uıymdastyrylady.
«Januıa» ortalyǵynda «Beıbitshilik — el tilegi», «Qamqor» ortalyǵynda «Birlik bolǵan jerde, biz jeńilmeımiz» atty is-sharalar ótedi. Al Dostyq úıinde «Mámile» pikirtalas klýbynyń otyrysy jáne «Halyq Konstıtýtsııasy — birlik pen damýdyń keleshegi» atty konferentsııa uıymdastyrylady.
Sondaı-aq Barshyn kóshesi, 30/2 mekenjaıyndaǵy dene shynyqtyrý-saýyqtyrý kesheninde ústel tennısinen jarystar ótedi. Baıqońyr aýdanynda toǵyzqumalaq, asyq atý jáne armrestlıng sport túrlerinen jarystar ótedi.
Merekelik is-sharalar 2-3 mamyr kúnderi de jalǵasady. Bul kúnderi aýyl sharýashylyǵy jármeńkeleri (onyń ishinde «Keryen Joly» SOO aýmaǵynda), saýda-oıyn-saýyq ortalyqtaryndaǵy kontsertter jáne «Qazaqstan — birlik pen tatýlyqtyń mekeni» atty dóńgelek ústel ótedi.
Іs-sharalardyń bári qoǵamdyq kelisimdi nyǵaıtýǵa, etnosaralyq ózara is-qımyldy damytýǵa jáne birlikti nasıhattaýǵa baǵyttalǵan.
Buǵan deıin Shymkentte merekelik bir rettik áleýmettik kómek kimderge beriletinin jazǵanbyz.
