Astanada Qazaqstan fýtbol klýbtarynyń dárigerlerine arnalǵan semınar ótedi
ASTANA. Qyrkúıektiń 14-i. QazAqparat /Ernur Aqanbaı/ - Qyrkúıektiń 18-inde Astanada Qazaqstan fýtbol klýbtarynyń dárigerlerine arnalǵan semınar bolady. Ony álemge tanymal nemis mamany, doktor Tomas Pfaıfer ótkizedi. Sharany Qazaqstan fýtbol federatsııasy men «Lokomotıv» fýtbol klýby birlesip uıymdastyryp otyr. Semınardyń basty maqsaty - otandyq sport salasyndaǵy dárigerlerdiń biliktiligin arttyrý.
«Tomas Pfaıfer - sport medıtsınasy áleminde dúnıe júzine tanymal, biliktiligi joǵary maman. Ol biregeı ádistemelerdi oılap tapqan. Doktor Pfaıfer sportshylardy jan-jaqty emdep, saýqtyrýǵa mamandanǵan. Ol óziniń eńbek jolyn 1984 jyly bastady jáne on jyl boıy (1987-1996 jyldary) Kelndegi ýnıversıtettiń hırýrgııa bóliminiń meńgerýshisi boldy. 1996 jyly doktor Pfaıfer Leverkýzende travmatologııalyq ortalyq ashty. Gandboldyq jáne «Baıer» fýtbol klýbynda jumys tájirıbesi bar», delingen Qazaqstan fýtbol federatsııasy taratqan habarlamada.
Qazaqstan fýtbol federatsııasynyń Bas hatshysy Saıat Hamıtjanovtyń sózine qaraǵanda, Doktor Pfaıfer qazaqstandyq áriptesterimen tájirıbe bólisý týraly usynysty jaqsy qabyldaǵan. «Shyn máninde bul óte aıtýly oqıǵa bolaıyn dep tur. Óıtkeni, álemdik sport medıtsınasynda bundaı deńgeıdegi mamandar saýsaqpen sanarlyq. Doktor Pfaıfer sporttaǵy travmatologııa salasynda álemge áıgili maman. Onyń Leverkýzendegi ortalyǵynda kóptegen fýtbolshy aıaǵynan tik turyp ketti», deıdi S. Hamıtjanov.
