Astanada Qazaqstan dintanýshylarynyń úshinshi forýmy boldy

Іs-sharaǵa memlekettik organdardyń ókilderi, belgili qazaqstandyq dintanýshy ǵalymdar, teologtar, orta mektepterdiń «Dintaný negizderi» páni muǵalimderi, joǵary oqý oryndarynyń oqytýshylary, dinı birlestikterdiń, qoǵamdyq uıymdar men buqaralyq aqparat quraldarynyń ókilderi qatysyp, sóz sóıledi. Qazaqstan dintanýshylarynyń jyl saıynǵy forýmy bıyl plenarlyq otyrystan bastalyp, onda Forýmnyń negizgi taqyryby talqyǵa salyndy. Odan keıin tórt sektsııalyq otyrys jalǵasyn taýyp, onda zaıyrly memlekettegi dinı saıasattyń mańyzdy máseleleri qozǵaldy. Forýmda Qazaqstan Respýblıkasy Ákimshiligi Basshysynyń orynbasary Baǵlan Maılybaev quttyqtaý sóz sóıledi. «Zaıyrly memleket jáne zaıyrly qoǵam Memleket basshysy Nursutan Nazarbaevtyń «Qazaqstan-2050» Strategııasynda belgilengen negizgi qundylyqtardyń biri bolyp tabylady. Qazaqstan halqy Assambleıasynyń HH sessııasynda Memleket basshysy «bizdiń tarıhı tańdaýymyz - zaıyrly memleket jáne qoǵam» ekenin atap kórsetti», - dedi B.Maılybaev. Qazaqstan Respýblıkasy Din isteri agenttiginiń tóraǵasy Marat Ázilhanov quttyqtaý sóz sóılep, óz baıandamasynda zaıyrly memlekettegi dinniń róline basa nazar aýdardy. Sondaı-aq, plenarlyq otyrysta «Dintanýshylar kongresi» QO tóraǵasy, L.N. Gýmılev atyndaǵy EUÝ fılosofııa kafedrasynyń meńgerýshisi Ǵarıfolla Esim «Qazirgi zamandaǵy dinı ahýal jáne zaıyrly memlekettegi dintanýshylardyń róli» taqyrybynda baıandama jasap, Parlament Májilisiniń depýtaty Qamal Burhanov Qazaqstandaǵy dinı toleranttylyq jaıynda aıtty. Forýmnyń maqsaty - din salasyndaǵy memlekettik saıasatty iske asyrý boıynsha birigip qyzmet etýge eldegi otandyq ǵylymı jáne sarapshylar qaýymdastyǵynyń nazaryn aýdarý, jalǵan dinı aǵymdardyń, sondaı-aq, ekstremızm men terrorızmniń yqpalyn tómendetý faktory retindegi dintaný biliminiń sapasyn joǵarylatýdyń ınnovatsııalyq joldaryn anyqtaý, dinı aǵartý men halyqtyń dinı saýatyn kóterýdegi bilim berý júıesiniń orny men rólin tabý jáne anyqtaý bolyp tabylady. «Zaıyrly memlekettiń din salasyndaǵy saıasatyn iske asyrý: aımaqtyq tájirıbe jáne problemalar» atty birinshi sektsııada eldegi konfessııaaralyq turaqtylyqty saqtaý boıynsha memlekettik saıasatty iske asyrý kezinde týyndaıtyn kúrdeli máseleler talqylandy. «Qazaqstannyń zaıyrly oqý oryndaryndaǵy dintaný negizderin oqytý sapasyn arttyrý: ádisnamalyq jáne praktıkalyq aspektiler» atty ekinshi sektsııada dintaný negizderin orta jáne joǵary oqý oryndaryna mańyzdy oqý pánderiniń biri retinde engizý jolymen jastar ortasynda dinı saýattylyq deńgeıin kóterýdiń róli men mańyzy talqyǵa salyndy. «Zaıyrly memlekettegi dinı radıkalızmniń aldyn-alý ádisnamalary» atty úshinshi sektsııanyń qatysýshylary dinı radıkaldy aǵymdardyń qyzmetterine qatysty ózekti máselelerdi, sondaı-aq qoǵamda paıda bolatyn qaýip-qaterlerdi der kezinde anyqtaý tetikteri men olardy sheshý joldaryn ortaǵa saldy. «Qazirgi Qazaqstan aýmaǵyndaǵy ıslamnyń tarıhy» atty tórtinshi sektsııada Qazaqstan úshin dástúrli bolyp tabylatyn súnnıttik ıslamnyń hanafı mázhabyn qazaq halqynyń salt-dástúrleri men ádet-ǵuryptaryn eskere otyryp nasıhattaý qajettigi jaıynda aıtyldy. Bıyl tuńǵysh ret Qazaqstan dintanýshylarynyń forýmynda joǵary oqý oryndarynyń úzdik oqytýshylary men mektepterdiń «Dintaný negizderi» páni muǵalimderi Dintanýshylar kongresiniń qurmet gramotalarymen jáne estelik syılyqtarmen marapattaldy. Forýmdaǵy basty oqıǵalardyń biri - «E-Islam» aqparattyq-aǵartýshylyq ǵalamtor-portalynyń tusaýkeseri boldy. QR Din isteri agenttiginiń tóraǵasy Marat Ázilhanov bul portal Memleket basshysy Nursultan Ábishuly Nazarbaevtyń Islam yntymaqtastyǵy uıymy memleketteri Syrtqy ister mınıstrleriniń 38-shi otyrysynyń qorytyndylary boıynsha bergen tapsyrmasyn oryndaý maqsatynda daıyndalǵanyn aıtty. «E-Islam» ǵalamtor-portaly kópshilik qazaqstandyq aýdıtorııaǵa Qazaqstandaǵy ıslam týraly tolyqqandy aqparat berýge arnalǵan. Odan keıin QR Din isteri agenttiginiń Aqparattyq-konsýltatıvtik ortalyǵy janynda qyzmet etetin «Qaýyrt jeli - 144» jobasynyń da tanystyrylymy ótti. Bul joba Din isteri agenttiginiń tapsyrysy boıynsha júzege asyryldy. Jobanyń maqsaty - azamattar men uıymdardan dinı salaǵa qatysty barlyq máseleler boıynsha aqparattardy qabyldaý, sonymen birge, destrýktıvti dinı aǵymdardyń qyzmetinen zardap shekkenderge konsýltatsııalyq jáne psıhologııalyq kómek kórsetý bolyp tabylady. Azamattar «Qaýyrt jeliniń» 114 nómirine Qazaqstannyń barlyq aımaǵynan táýlik boıy qońyraý shala alady. Ortalyqta kásibı psıhologtar, zańgerler, dintanýshylar jumys jasaıdy. Keńes berý tegin ári qupııa túrde júrgiziledi.