Astanada Qazaqstan boks federatsııasy kýbogynyń fınaldyq kezeńi ótedi

ASTANA. KAZINFORM – 13 jeltoqsan kúni Astana qalasynda Qazaqstan boks federatsııasy kýbogynyń fınaldyq kezeńi bastalady. 

Ulttyq olımpıadalyq komıtettiń málimetinshe, júlde qory 150 000 AQSh dollaryn quraıtyn joba aımaqtarda boksty damytýǵa baǵyttalǵan. 

Toptyq kezeńniń qorytyndysy boıynsha sheshýshi synǵa Astana, Shymkent qalalarynyń, sondaı-aq Qaraǵandy jáne Mańǵystaý oblystarynyń komandalary joldama aldy. 

13 jeltoqsanda erler men áıelder arasynda 15 salmaq dárejesi boıynsha jartylaı fınaldyq jekpe-jekter ótedi. 14 jeltoqsan kúni úshinshi jáne birinshi oryndar úshin kezdesýler josparlanǵan. 

Qazaqstan jeńil atletıka sport keshenindegi jarys 13 jeltoqsan kúni saǵat 11:30-da, 14 jeltoqsan kúni saǵat 12:00-de bastalady. 

Eske salsaq, osyǵan deıin Dýbaıdaǵy álem chempıonatynda qaı elden qansha boksshy fınalǵa joldama alǵanyn jazǵanbyz.