Astanada «Qazaqstan Arýy-2015» baıqaýy ótip jatyr
ASTANA. QazAqparat - Astanada Beıbitshilik jáne kelisim saraıynda «Qazaqstan Arýy-2015» 19-shy respýblıkalyq baıqaýynyń qorytyndy sharasy ótýde.
Baıqaýǵa Qazaqstannyń ár oblysynan 30 úmitker qatysýda. Baıqaýǵa qatysyp otyrǵandardyń ishinde jýrnalıst, halyqaralyq zańger syndy mamandyq ıeleri bar. Tipti mektep oqýshylary da baqtaryn synaı kelgen.
«Qazaqstan Arýy-2015» jeńimpazyna 5 mıllıon teńge syılyqpen qatar etnostıldegi qyz jasaýy tartý etilmek. Qazaqtyń dástúrli qyz jasaýy «Altyn orda» avtorlyq dızaın úıi sheberleriniń qolymen jasalǵan. Saltanatty jıyntyqqa «Mahabbat kórpesi», sandyqtar, «Bederli órnekter» shal jastyǵy, qoldan tigilgen jastyqtar, sondaı-aq dástúrli dastarqan kiredi. Osynyń barlyǵyn ulttyq dástúrdi urpaqtan urpaqqa dáripteýdi maqsat tutyp otyrǵan etno-dızaıner Yrza Tursynzada jasap otyr.
Baıqaýdyń ádil ári ashyq ótýi úshin elimizdiń eń sulý arýyn qazaqstandyqtar onlaın jáne SMS daýys berý arqyly tańdaı alady. Aıta ketý kerek, aldymen eń úzdik úshtikti qazylar alqasy anyqtaıdy.
Qazylar alqasyna taǵaıyndalǵan adamdardyń ishinde elimizdiń tanymal ári qurmetti azamattary: Qazaq ulttyq óner ýnıversıtetiniń rektory Aıman Musaqojaeva, «Astana» fýtbol klýbynyń bas menedjeri Qaısar Bekenov, ǵaryshker Aıdyn Aıymbetov jáne aktrısa Ásel Saǵatova bar.
Sonymen birge qazylar qataryna «Mıloserdıe» qaıyrymdylyq qorynyń dırektory Arýjan Saın, veloshabandoz Aleksandr Vınokýrov, «Astana Jastary» jastar ortalyǵynyń basshysy Ánýar Nupeıisov, «Altyn Orda» avtorlyq dızaın úıiniń etno-dızaıneri Yrza Tursynzada jáne «Qazaqstan Arýy» baıqaýynyń prezıdenti Alena Rıvlına-Kyrbasova kirip otyr.
2015 jyly uıymdastyrýshylar baıqaýda naǵyz shoý bolady dep ýáde berýde. Bas rejısser retinde jas akter ári rejısser Maksım Akbarov tańdalypty.
Baıqaýdyń saltanatty rásimin tanymal telejúrgizýshi Dınara Satjan men jas akter Táýekel Músilim júrgizedi.
«Qazaqstan Arýy-2015» baıqaýynyń fınalyn «NTK» telearnasy 20.00 saǵatta tikeleı efırde kórsetedi.
