Astanada Qazaqstan-amerıkan horeografııalyq ujymdarynyń birlesken kontserti ótti
STANA. Qyrkúıektiń 24-i. QazAqparat /Gúlmıra Álıakparova/ - Búgin tańerteń, Astanadaǵy Kongress-Holl saraıynda Qazaqstan-amerıkan horeografııalyq ujymdarynyń «Óner álemin Astana biriktiredi» atpen birlesken kontsertteri ótti.
Kontsertti Vashıngton shtatynan kelgen «Sıtı Dens» qazirgi zamanǵy bı ujymy, Atyraý qalasyndaǵy N.Tilendıev atyndaǵy Kishi óner akademııasy men Semeı qalasynyń Balet mektebiniń ujymdary berdi.
Sharany uıymdastyrýshylar - QR Bilim jáne ǵylym mınıstrligi, «Daryn» Respýblıkalyq ǵylymı-praktıkalyq ortalyǵy, "QR Prezıdentiniń «Bolashaq» halyqaralyq stıpendııasy qaýymdastyǵy jáne Qazaqstandaǵy AQSh Elshiligi.
«Daryn» Respýblıkalyq ǵylymı-praktıkalyq ortalyǵynyń dırektory Tildásh Bıtýovanyń aıtýynsha, «Sıtı Dens» ujymyna qazaqstandyq jas talanttarmen birlesip óner kórsetý usynysy óz tarapymyzdan jasaldy.
«Sharany ótkizýdegi maqsat - daryndy balalardy izdep tabý jáne olardy qoldaý. Bizdiń jelimizde 107 mektep bar. Olardyń ishinde bir mektep - Semeıdegi balet mektebi, taǵy biri Atyraý qalasyndaǵy N.Tilendıev atyndaǵy Kishi óner akademııasy. Amerıkandyq «Sıtı Dens» bı ujymy bizdiń balalarǵa arnap kontsert beremiz degende, bıyl Qazaqstannyń EQYU-ǵa tóraǵalyǵy aıasynda sondaı-aq, aldaǵy EQYU sammıti aıasynda nelikten birlesken joba jasamaımyz degen oı týyndady», - dedi ol.
T.Bıtýova, álemdegi eń tanymal balet ujymdarynyń birimen bir sahnada óner kórsetý, qazaqstandyq balalardy yntalandyryp, jetistikterge umtylýǵa jeteleıdi degen senimin bildirdi.
Sahnada amerıkalyq ujymdy qospaǵanda Atyraý men Semeıden 80-ge jýyq bala óner kórsetti.
AQSh-tyń Qazaqstandaǵy Ýaqytsha senimdi ókili Pamela Spratlen, Qazaqstan Úkimeti munsha balanyń Astanaǵa kelýine yqpalyn tıgizýi, elde mádenıet, óner men bilimge degen yqylastyń joǵary ekendigin kórýge bolatyndyǵyn aıtty.
Aıta keteıik, «Sıtı Dens» ujymy 2009 jyly Kolýmbııa okrýginde mádenıet salasynda beriletin eń joǵary nagrada - Vashıngton meriniń nagradasyna ıe bolyp, Vashıngtondaǵy eń bedeldi qazirgi zamanǵy bı ujymy atandy.
Qazaqstan-amerıkan balet ujymdary búgin Kongress-Holda mektep oqýshylary úshin kontsertti tegin berdi, al qyrkúıektiń 25-i kúni Beıbitshilik jáne kelisim saraıynda olar bı ónerin súıer qaýym men osy sala maıtalmandarynyń aldynda óner kórsetedi.
