Astanada qazaqsha KVN oıyndarynyń jartylaı fınaldyq oıyndary ótti
«Biriligimiz jarasqan!» uranymen ótken jartylaı fınaldyń alǵashqy kúninde 6 komanda óner kórsetti. «Qyzyq orda» (Qyzylorda), «Nur-Astana» (Astana), «Dostar kz» (Semeı), «Ádemi» ( Aqtóbe), «Aral-As» (Aral) jáne «Qazaq Ulttyq ýnıversıteti» (Almaty).
Komandalar 4 kezeń boıynsha saıysqa tústi. Sálemdesý - komanda týraly jalpy kórinis berý. Dybystaý - ıaǵnı mýltıplıkatsııalyq ne bolmasa kınofılmderden alynǵan úzindilerdi dybystaý. Qaıym aıtys -usynylǵan eki aýyz óleńdi uıqaspen aıaqtaý. Bir áýendi saıys - qaljyndardy áýenge salyp jetkizý.
«Kóńildiler men tapqyrlardyń» qaljyndary ádettegideı, qoǵam men saıasattaǵy túıitkildi máselelerge, eldegi jalpy ahýaldar men egemendi eldiń jetistikterine toly boldy. Máselen, Qazaqstandaǵy fýtbol sportynyń jaǵdaıy men Eýrokýbok aıasyndaǵy Belgııamen jáne Germanııamen aldaǵy oıyndar, Aral teńizindegi problemalar men onyń jastardyń armanyndaǵy bolashaq keıpi, jıyrma jyldan astam ýaqyt boıy qurylysy aıaqtalmaı kele jatqan Almatynyń metrosy, óz elinde tórge shyǵa almaı jatqan aıtys óneri tilge tıek etildi. Sonymen birge jastar, birligi jarasqan kópultty Qazaqstanda turatynyn maqtan etetinin, qazaq halqynyń salt dástúrleri men jastar arasynda memlekettik tildi damytýǵa qosyp jatqan úlesi zor qazaqsha KVN oıyndaryn damytýǵa nıetti ekendikterin bildirdi.
Oıyn barysynda aldaǵy jyldyń basynda elimizde ótetin 7-shi Qysqy Azııa oınydary barynsha nasıhattaldy.
Qazylar alqasynyń tóraǵasy, QR Parlamenti Májilisiniń depýtaty Nurtaı Sabılıanov, talapty da talantty jastarǵa talmas qanat tileı kele, qazaq tildi KVN búgingi kúni úlken jetistikterge qol jetkizip otyrǵanymen, onda jetildirilýi tıis tustar áli de bar ekendigin atap ótti. Máselen ol, qaljyndardy kórermenderge usynbas buryn, sahna mádenıetin saqtaý maqsatynda olardy ábden súzgiden ótkizý qajettigin qadap aıtty.
Tartysty ótken saıystyń nátıjesinde fınaldyq oıyndarǵa joldamany eki komanda - «Dostar kz» jáne «Qyzyq orda» aldy.
Aıta keteıik búgin, qazannyń 6-sy kúni Kongress-Hollda respýblıkalyq joǵary lıga aıasyndaǵy jartylaı fınaldyq oıyndardyń ekinshi kúni ótedi. Óner kórsetetin komandalar - «Jıgýlı» (Atyraý), «Erketaı» (Aqtóbe), «Seriler» (Semeı), «Kúltegin» (Astana), «Qaraǵandy quramasy» jáne «Qorqyt quramasy» (Qyzylorda).
Aqtyq saıys ústimizdegi jylǵy qarasha aıynyń ortasynda ótedi.
Qazaqsha KVN oıyndary «Qazaqstan KVN Odaǵy» respýblıkalyq jastar qoǵamdyq birlestiginiń uıymdastyrýymen jáne Qazaqstan Respýblıkasy Mádenıet mınıstrliginiń qoldaýymen ótti.
