Astanada qazaqsha KTK oıyndarynyń «Chempıondar lıgasy» ótti
ASTANA. Naýryzdyń 15-i. QazAqparat /Gúlmıra Álıakparova/ - Ótken senbi, naýryzdyń 13-i kúni Astanadaǵy KongressHoll saraıynda, 2009 jyly ótken oıyndarda jeńimpaz bolǵan (KVN) qazaq tildi KTK komandalary arasynda «Chempıondar lıgasy - 2010» arnaıy jobasy ótti,
dep habarlaıdy QazAqparat.
Bul kúnde jastardyń qyzyǵyp oınaıtyn, kópshiliktiń tamsana tamashalaıtyn oıyndarynyń biri - qazaqsha KVN. «Qazir iri qalalar men aýyldy eldi-mekenderde ótetin saıystarda bos oryndar bolmaıdy, bul qazaqsha KTK halyq arasynda tanymaldylyqqa ıe bola bastaǵanyn kórsetedi», - deıdi Qazaqstan KTK Odaǵynyń redaktory Marat Dosaev.
Chempıondar lıgasyna qatysqan 10 komanda Kishi jáne Úlken Kýbok úshin baq talastyrdy. Doda eki kezeńnen turdy - sálemdesý jáne qysqa qaljyndardan turatyn - janbatý saıysy. Jastar qoǵam ómirindegi keleli máselelerge qatysty tartymdy da utymdy qaljyndarmen qosa, án men bıden shashý shashty. Atap aıtqanda olar, naǵyz til janashyrlary ekenin, sportshylardyń osy ýaqytqa deıingi jetistikterin maqtan etip, aldaǵy 7-shi Qysqy Azııa oıyndarynda úlken úmit kútetinin, EQYU tóraǵalyǵyna Qazaqstan el birligi men úlken eńbektiń arqasynda qol jetkizgenin aıtty. Sondaı-aq oıynshylar qazaqtyń salt-dástúrleri men maqal-mátelderin barynsha nasıhattap, el táýelsizdiginiń baıandy bolýy jastarǵa tikeleı baılanysty ekenin jiti túsinetinin bildirdi. Qazaq kınostýdııalary túsirip jatqan moraldyq tárbıege qaıshy fılmder de jastardyń qaljyńǵa qosar taqyryptaryn aınalyp ótpedi.
Qazylar alqasynyń tóraǵasy ánshi, prodıýser Qydyráli Bolmanovtyń atap kórsetkenindeı, qazaqsha KTK oıyndary memlekettik tildi damytýdyń, onyń jastar arasynda qoldanylý aıasyn keńeıtýdiń birden-bir mehanızmi bolyp tabylady.
Tartysty ótken oıynnyń nátıjesinde Kishi Kýbokty 2009 jylǵy respýblıkalyq Saryarqa lıgasynyń chempıondary - «Taraz 2000» (Taraz qalasy) qurama komandasy, al Úlken Kýbokty ótken jylǵy premer-lıga chempıondary - «Sóz tımesin» (Shymkent qalasy) toby jeńip aldy.
