Astanada qazaqsha dýblıajdalǵan «Galaktıka saqshylary» fılmi kórsetildi
ASTANA. QazAqparat - Búgin Astanada "Bolashaq" qaýymdastyǵy "Nur Otan" partııasynyń qoldaýymen qazaq tiline aýdarylǵan Marvel stýdııasynyń "Galaktıka saqshylary" blokbasteriniń alǵashqy kórsetilimin uıymdastyrdy. Fılm dýblıajynyń bas demeýshisi - "Báıterek" Ulttyq basqarýshy holdıngi" AQ. Holdıng apparatynyń jetekshisi Ánýarbek Sultanǵazınniń aıtýynsha, dýblıajǵa shamamen 9 mln. teńge bólingen.
"Bizdiń holdıng osyndaı áleýmettik jobalarǵa burynnan qoldaý kórsetip keledi. Fılmge dýblıaj jasaýǵa demeýshilik etýimiz birinshiden qazaq tiliniń qoldanylý aıasyn keńeıtý bolsa, ekinshiden dúnıejúzi asyǵa kútetin, tárbıelik mańyzy zor osyndaı deńgeıi joǵary fılmderdi dýblıajdaýmen turaqty túrde aınalysyp kele jatqan Bolashaq qaýymdastyǵyna qoldaý kórsetý", - dep atap ótti ol. Aıta keteıik, qazaq tili "Galaktıka saqshylary" fılminiń keıipkerleri sóılegen álemdegi aǵylshyn, frantsýz, nemis, ıspan, portýgal, orys jáne basqa da tilderdiń qataryndaǵy 18-shi til bolyp otyr. "Galaktıka saqshylary" blokbasteriniń bas keıipkeri - Juldyzdy Lordty osyǵan deıin de fılmderdi qazaq tiline dýblıajdaý jumysyna qatysyp júrgen Tımýr Pııazov dybystady. Al "Malefısenta" fılmi boıynsha tanymal bolǵan Gúlnaz Áýesbaeva bas qaharmandardyń biri Gamorany dýblıajdady. Dýblıajdyń rejısseri kınematografııa salasyndaǵy jas maman Tımýr Balymbetov, ol úshin "Saqshylar" dýblıaj salasyndaǵy alǵashqy rejısserlik tájirıbe boldy. Dýblıaj ádettegideı "Sınema Ton Prodakshn" qazaqstandyq stýdııasynda jasaldy. Bul Marvel, WaltDisney men SonyPictures stýdııalarynyń týyndylaryna dýblıaj jasaýǵa resmı tirkelgen stýdııa. Fılmdegi ázilder, keıipkerlerdiń rólin asha túsetin urymtal sózder óte joǵary deńgeıde aýdarylyp, dybystalǵan fılm kórermenniń kóńilinen shyǵyp, joǵary baǵasyn aldy. Endi ol elimizdiń kınoteatrlarynan kórsetiletin bolady.
