Astanada «Qazaqfılmniń» «Mahabbat tálkegi» atty jańa kartınasynyń tusaýy kesildi

dep habarlaıdy QazAqparat.

«Mahabbat tálkegi» atty romantıkalyq komedııany - «Qazaqfılm» men reseılik «Interfest» kınokompanııasy birlesip túsirdi.

Buǵan deıin habarlanǵandaı, kartınanyń jalpy bıýdjeti 2 mıllıon AQSh dollary jáne ol bir jylǵa jýyq ýaqyt Máskeýde jáne Astanada túsirildi. Onyń basty rólderin «Kúndizgi sholǵynshy», «Toǵyzynshy rota», «Úlken qaladaǵy mahabbat» kınolarynda túsken reseılik ártis Alekseı Chadov pen «Reketır», «Mahambettiń naızasy» fılmderinde oınaǵan qazaqtyń jas ártisi Ásel Saǵatova somdady. Sondaı-aq, onda Irına Rozanova, Gosha Kýtsenko, Olga Orlova (Reseı) jáne Erik Joljaqsynov, Farhat Abdiraıymov (Qazaqstan) pen basqa da tanymal ártister qatystyryldy.

Eger buǵan deıin «Qazaqfılmniń» týyndylary 50 kóshirmemen ǵana shektelip kelse, «Mahabbat tálkegi» birden 600 danamen shyǵaryldy. Fılm birdeı 4 memlekette kórsetiletin bolady - Qazaqstan, Reseı, Ýkraına jáne Belarýs.

Astanadan keıin kartına tusaý kesý rásimimen Almatyǵa (naýryzdyń 20-sy), Qazanǵa (naýryzdyń 21-i), Máskeýge (naýryzdyń 22-si) jáne Kıevke (naýryzdyń 23-i) jol tartady.

«Mahabbat tálkegi» fılmi Ásel atty asa kelbetti boıjetken jaıynda. Aýqatty kúıeý jigittiń arqasynda Áseldi qoǵamnyń betke ustar qaımaqtary árdaıym óz qatarlaryna qosyp, ózderimen teń kóredi. Alaıda ol bul ortada óz jetistikteriniń arqasynda syıly bolǵysy keledi. Oǵan bul jolda onyń qurbysy Jenıa qol ushyn sozbaq bolyp, ol úshin bir ǵana shart qoıady. Ásel dámhanaǵa alǵash kirip kelgen jigitti ózine ǵashyq etýi tıis bolady. Ol adam - ómiri joly bolmaıtyn oqymysty Ivan bolyp shyǵady. Anasynan basqa eshkimdi elemeıtin oqymysty jigitti ózine ǵashyq etemin dep oqtalǵan boıjetken, oǵan ózi qalaı ǵashyq bolyp qalǵanyn bilmeı qalady. Aqyrynda alǵashqy shynaıy mahabbaty úshin úılený toıynyń ústinde dáýletti kúıeý jigitin tastap ketedi.