Astanada qazaq tilinde onlaın-kontent jasaýshylardyń VII forýmy ótip jatyr

ASTANA. KAZINFORM – Tanymal medıa sarapshylar, jýrnalıster, bas redaktorlar, blogerler bas qosqan forýmda qazaqtildi onlaın medıany damytý máseleleri jan-jaqty talqylandy.

QazForum – ınternettegi qazaqsha kontentti damytýǵa arnalǵan biregeı kásibı alań. AQSh-tyń Qazaqstandaǵy Elshiliginiń qoldaýymen jyl saıyn uıymdastyrylatyn is-sharada ózekti problemalar qaýzalyp, tyń ıdeıalar aıtylatynyn atap ótken jón. Bıylǵy forýmnyń basty taqyryby: «Bolashaqtyń dıdary. Jańa tehnologııalar jáne medıa».

Forým aıasynda kúndelikti ómirde neırojelilerdi paıdalaný men jasandy ıntellekttiń kómegimen kontent jasaýdyń tásilderi boıynsha master-klasstar ótkiziledi. Budan bólek, Batys Qazaqstan oblysynan sý tasqyny týraly 360 formatta túsirilgen arnaıy reportaj da qatysýshylardyń nazaryna usynylady.

Uıymdastyrýshylardyń málimetinshe, búginde stýdentterdiń 61%-y qazaq tilinde oqıdy, BAQ-taǵy kontenttiń 83%-y qazaq tilinde beriledi. Qujat aınalymynyń 99,8%-y qazaq tilinde júrgiziledi. Al, Qazaqstandaǵy qazaqtardyń úlesi 70,65%-ǵa jetken.