Astanada qazaq tiline dýblıajdanǵan kórkem fılmge arnalǵan alǵashqy fleshmob ótkizildi
ASTANA. 26 mamyr. QazAqparat - Elordadaǵy «Kerýen» saýda ortalyǵynda keshe «Men in Black 3» týyndysynyń qazaq tildi nusqasy «Qara kıimdiler 3» fılmine arnalǵan fleshmob ótkizildi. Aktsııanyń urany - «Ózinneń basta!».
Іs-shara fılmniń 24 mamyr kúni elimizdiń 20 qalasyndaǵy 50 kınoteatrlarynda ótkizilgen premerasyna oraı uıymdastyryldy. Álemdik kórsetilimnen 1 kún buryn, ıaǵnı 22 mamyr kúni Qazaqstannyń zııaly qaýymynyń ókilderiniń qatysýymen fılmniń aldyn ala kórsetilimi ótkizilgen bolatyn.
Fleshmobqa fılm keıipkerleri sekildi qara kostıým, qara kózildirik, qara galstýk kıgen 60 shaqty adam qatysty. Saýda ortalyǵynyń qonaqtary ózge ǵalamsharlyqty, ózge ǵalamsharlyqtarmen kúresetin agentterdi, «Men in black» saýndtregine qoıylǵan bıdi kóre aldy. Bul óleń alǵash ret qazaq tilinde oryndaldy.
Sonymen qatar, aktsııa sheńberinde sózjumbaq, fotosessııalar uıymdastyryldy.
«Qara kıimdiler 3» jobasynyń júzege asyrylýyna «Bolashaq» qaýymdastyǵy, «MARWIN» kompanııasy jáne «Samuryq-Qazyna» ulttyq ál-aýqat qory atsalysty.
«Bolashaq» qaýymdastyǵy men «MARWIN» kompanııasy úshin «Qara kıimdiler 3» memlekettik tildiń qoldanys aıasyn arttyrý men gollıvýdtyq fılmderdi qazaq tiline kórkemdik dýblıajdaýǵa baǵyttalǵan ekinshi joba bolmaq. Bul baǵyttaǵy jumysqa Walt Disney stýdııasynyń 2011 jyly qazaq tiline dýblıajdanǵan «Kólikter 2» («Cars 2») mýltfılmi bastama boldy.
