Astanada qazaq tilinde sóıleıtin túrli ult ókilderi jarysqa tústi

  ASTANA. QazAqparat - Astanada etnomádenı birlestikterdiń jastar qanaty ókilderi uıymdastyrǵan «Til dostyqtyń altyn kópiri» atty memlekettik tildi meńgerýge arnalǵan jarys ótti, dep habarlaıdy QazAqparat tilshisi.

Qalalyq baıqaý Qazaqstandaǵy ózge ult ókilderiniń memlekettik tildi meńgerýine múmkindik jasaýǵa baǵyttalǵan jáne búgin saıystyń sheshýshi kezeńi aıaqtaldy.

«Rýhanı jańǵyrý: qoǵamdyq sanany jańǵyrtý» baǵdarlamasy aıasynda memlekettik tildiń mártebesin kóterip, onyń qoldaný aıasyn keńeıtý maqsatynda etnomádenı birlestikterdiń jastar qanaty arasynda til baıqaýyn ótkizdik. Baıqaý eki kezeńnen quralǵan jáne búgin alǵashqy irikteý týrynan ótken saıyskerler baq synasty», - dep atap ótti Astana ákimdigi QHA hatshylyǵynyń bas mamany Gúlnar Taıgokova. 

Bas mamannyń aıtýynsha, jyl ótken saıyn baıqaýǵa degen qyzyǵýshylyq artyp keledi jáne qatysýǵa nıet bildirgen jastar sany kóbeıýde. Aldaǵy ýaqytta da jastardyń úsh tuǵyrly tilge kóship, básekege qabiletti bolýy úshin til baıqaýyn kóptep ótkizý josparlanǵan.

Baıqaý qatysýshylaryna «Meniń otanym - Qazaqstan» taqyrybynda týǵan jerlerin qazaq tilinde tanystyryp, qazaqtyń tanymal aqyn-jazýshylarynyń shyǵarmalaryn mánerlep oqyp, júrgizýshiler suraǵyna jaýap berý mindettelgen.

Uıymdastyrýshylardyń habarlaýynsha, baıqaý úshin arnaıy baǵdarlama ázirlengen.

«Baıqaý barysynda adamnyń tildi qanshalyqty meńgergenin baǵamdaýǵa bolady. Bolashaqta baıqaýdan bólek, festıvalder, kezdesýler, ádebı-mýzykalyq keshter sekildi ózge de qoǵamdyq-buqaralyq sharalar ótkizý kózdelgen», - dep óz sózin túıindedi G.Taıgokova.