Astanada qazaq-ózbek zııaly qaýymynyń alǵashqy forýmy ótip jatyr
ASTANA. KAZINFORM — Búgin elordada qazaq-ózbek zııalylary bas qosty.
Alǵash uıymdastyrylǵan forýmǵa Senat tóraǵasy Máýlen Áshimbaev jáne Ózbekstan Olıı Májilisi Senatynyń tóraǵasy Tanzıla Narbaeva bastaǵan qazaq-ózbek ǵylymı-shyǵarmashylyq zııaly ókilderi qatysyp jatyr.
— Qurmetti Tanzıla Narbaeva, qadirli forýmǵa qatysýshylar, qonaqtar ózderińizben Astanada bas qosqanymyzǵa qýanyshtymyz. Qonaqjaı qazaq eline qosh keldińizder! Búgin Qazaqstan men Ózbekstannyń ǵylymı-shyǵarmashylyq zııaly qaýymy jınalyp otyr. Qazaq-ózbek zııalylarynyń forýmy baýyrlas halyqtardyń rýhanı yntymaqtastyǵyna jańa jol ashady. Forýmnyń Ózbekstan Olıı Májilisi Senatynyń tóraǵasy Tanzıla Narbaevanyń Qazaqstanǵa resmı sapary aıasynda ótýi is-sharanyń mańyzyn odan ári arttyra túsedi, — dedi Senat tóraǵasy Máýlen Áshimbaev forýmnyń ashylý saltanatynda.
Senat spıkeriniń aıtýynsha, Qazaqstan men Ózbekstan qarym-qatynasynyń aýqymy keń.
— Biz tek tatý kórshi ǵana emespiz, ekijaqty qarym-qatynas shynaıy dostyq pen baýyrlastyqqa negizdelgen. Salt-dástúr, rýhanııat túbiri bir ortaq mádenı mura. Qazaq halqy ózbek halqyna únemi iltıpat tanytyp, baýyr retinde qurmet tutady. Qýanyshta da, qıyn-qystaý kezde de bir-birimizge kómek qolyn sozyp, baýyrlastyq tanytyp kelemiz. Bizdiń qazirgi shekara bolmaǵan kezde, ertede uly Jibek joly jalǵap jatty. Osyndaı tarıhı sabaqtastyq yntymaqtastyǵymyzdy nyǵaıtyp, qarym-qatynasqa jańa serpin berip jatyr, — deıdi tóraǵa.
Keshe Prezıdent Qasym-Jomart Toqaev Ózbekstan Olıı Májilisi Senatynyń tóraǵasy Tanzıla Narbaevany qabyldady.
Memleket basshysy qos halyq arasyndaǵy dostyq, tatý kórshilik baılanystardy nyǵaıtýǵa Ózbekstan Olıı Májilisi Senaty tóraǵasynyń qosqan úlesin joǵary baǵalady.