Astanada qazaq kúresinen «Dala qyrandary» týrnıriniń jeńimpazdary anyqtaldy
Bul jarystyń ereksheligi – ár salmaqta bıylǵy reıtıngilik dodalarda eń kóp upaı ıelengen úzdik segiz balýan kilemge shyqty.
Olar segiz salmaq boıynsha chempıondyq ataqty sarapqa saldy.
Týrnır qorytyndysynda 55 kelige deıingi salmaqta soltústikqazaqstandyq Erkebulan Qalymbekovti negizgi ýaqytta uta almaǵanymen, qoıan-qoltyq beldesýde osal jerin tapqan qyzylordalyq Bekjan Tólepov jeńimpaz atandy. Ol sóıtip ótken jylǵy nátıjesin qaıtalady.
Almaty oblysynyń ókili Marat Nyǵmatýllaev (60 kg) atyraýlyq jas balýan Bekarys Muratulyn taza jeńdi.
Jambyldyq Nur Amanshúkirov (66 kg) taǵy bir atyraýlyq Nurbolat Іzimǵalıevten qoıan-qoltyq beldesýde aılasyn asyryp ketti. Jalpy, osy týrnırde Atyraý oblysynyń Qyzylqoǵa aýdanynan qatysqan Aıbek Serǵazıev jattyqtyratyn úsh balýan fınalǵa deıin jetti.
Shymkenttik Jumajan Qojambekov (74 kg) atyraýlyq Saǵat Ǵazımovty, ulytaýlyq Aıdyn Dartaev (82 kg) Abaı oblysynyń namysyn qorǵaǵan Ersin Seıitqazynovty utty.
Taǵy bir shymkenttik Toqtarbek Aıdarbek (90 kg) almatylyq Erasyl Jańataevty qapy qaldyrdy.
Kezinde «Qazaqstan barysy» atanǵan, Soltústik Qazaqstan oblysynyń namysyn qorǵap júrgen Muhıt Tursynov 100 kelige deıingi salmaqta qoıan-qoltyq beldesýde shymkenttik Marat Baıqamurovty súrindirdi.
Asa aýyr salmaqta mańǵystaýlyq, bıylǵy «Qazaqstan barysy» týrnıriniń kúmis júldegeri Nurdáýlet Jarylǵapov Almaty oblysynyń ókili Mádı Edilbaevty taza jeńdi.
«Dala qyrandary» dodasynda kútpegen nátıje de bolmaı qalǵan joq. Keıbir myqty degen balýandar jarys jolynan shyǵyp qalyp jatty. Mysaly, bıylǵy «Qazaqstan barysynyń» jeńimpazy, qyzylordalyq Maqsat Isaǵabylov alǵashqy beldesýinde-aq Oljas Shynkeevke jol berdi.
Bir aıta ketetin jaıt, týrnır jeńimpazdary aldaǵy jeltoqsan aıynda qazaq kúresinen ótetin álem chempıonatyna joldama aldy.
