Astanada qazaq kúresi men at báıgesinen jarys ótedi
ASTANA. QazAqparat - Aldaǵy senbi, jeksenbi kúni Astanadaǵy «Qazanat» atshabarynda at báıgesiniń eki túrinen jáne qazaq kúresinen respýblıkalyq jarys ótedi, dep qabarlaıdy QazAqparat tilshisi.
«EKSPO-2017» halyqaralyq kórme aıasyndaǵy atalmysh jarysty QR Mádenıet jáne sport mınıstrliginiń Sport jáne deneshynyqtyrý isteri komıteti, Qostanaı oblysynyń ákimdigi jáne QR Ulttyq sport túrleri qaýymdastyǵy uıymdastyryp otyr.
6 tamyz respýblıkalyq jarystyń bastalý kúni. Tús kezinde «Etnoaýyldaǵy» boz kilemde balýandar beldesýi bastalady. Bul qazaq kúresine 18 jastan asqan, salmaǵy 73 keliden joǵary balýandardyń barlyǵy qatysa alady.
Al, báıge túrlerine azdaǵan shekteýler bar. Alaman jáne top báıgege uıymdastyrýshy óńirden ózge Astana, Almaty qalalary men barlyq oblystar tek 2 júırikten ǵana qatystyra alady.
Alaman báıge 21 shaqyrym qashyqtyqty qurasa, top báıge 15 shaqyrym.
Báıgelerdiń bas júldesi - eki jeńil avtokólik. Ekinshi orynǵa - 2 mıllıon teńge. Besinshi oryn alǵan júırikke deıin júlde beriledi.
Al tól sportymyz qazaq kúresiniń jeńimpazy - 700 000 teńge qarjylaı syılyq alyp, arnaıy dıplommen, medalmen marapattalady. Úshinshi orynǵa deıin júlde bar.
