Astanada Qazaq KSR Prokýrory Ótegen Seıitovtiń 90 jyldyǵyna arnalǵan dóńgelek ústel otyrysy ótti
ASTANA. 13 qyrkúıek. QazAqparat - Búgin Astanada QR Bas prokýratýrasynda Qazaq KSR Prokýrory Ótegen Seıitovtiń 90 jyldyǵyna arnalǵan dóńgelek ústel otyrysy ótti.
Jıynǵa QR Bas prokýratýrasynyń qyzmetkerleri, sonymen qatar mereıtoı ıesiniń týǵan-týystary, balalary, dostary qatysty.
Ótegen Seıitov búkil sanaly ǵumyryn Qazaqstan prokýratýrasyna arnaǵan asa belgili zańger. Bilimi jetkilikti, uıymdastyrýshylyq qabileti zor, eńbekqorlyǵy erekshe jan prokýratýra salasyndaǵy baspaldaqtardyń bárinen múdirmeı ótip, abyroı bıigine jetti. Soǵys aıaqtalǵan soń Ótegen Seıituly Ońtústik Qazaqstan oblysynyń Keles aýdandyq prokýratýrasynda halyq tergeýshiliginen bastap, odan keıin oblystyq prokýratýrada qyzmet atqarǵan. 1951-1962 jyldar arasynda Qazaq KSR prokýratýrasy bóliminiń prokýrory, Almaty qalasy Keńes aýdany prokýrory, Almaty oblysynyń prokýrory, Qazaq KSR Prokýrorynyń orynbasary bolyp qyzmet atqaryp,óziniń kásibı ustanymy arqasynda ǵana ósti. Ótegen Seıitulynyń iskerlik qabiletteri, ótken ómir mektebi, jınaqtaǵan tájirıbesi, prokýratýra organdarynyń ózindik erekshe ornyn bekitýge baǵyttalǵan izdenisteri 1966 jyly, bar bolǵany 43 jasynda Qazaq KSR Prokýrory laýazymyna taǵaıyndalýyna sebep boldy. Sóıtip, Ótegen Seıituly 18 jyl boıy Qazaqstan prokýratýrasyn basqardy. Ótegen Seıitov asa bedeldi bolǵan. Ol kezdegi Odaq Bas prokýratýrasynyń qyzmetkerleri, odaqtas respýblıkalardyń prokýrorlary ony erekshe qurmettegen.
Ótegen Seıituly respýblıka Prokýrory jumysyn qolǵa alǵannan bastap, prokýratýranyń basty mazmuny zańdylyq pen quqyq qorǵaýdy qamtamasyz etý, azamattardyń áleýmettik-ekonomıkalyq, saıası jáne jeke quqyqtary men bostandyqtaryn qorǵaý, quqyq buzýshylyqty boldyrmaý ekendigin erekshe aıqyndaıtyn kóptegen baǵyt-baǵdaryn aıqyndap, prokýrorlyq qadaǵalaýdyń tıimdi tásilderin engizýge kúsh saldy.Talaı izgi ister atqaryldy, prokýratýra organdarynyń materıaldyq jáne quqyqtyq salasy jańasha ózgertildi.