Astanada «Qazaq handyǵy: Uly dalanyń uly beıneleri» kórmesi ashylady
ASTANA. QazAqparat - 25 aqpanda, Astanada Qazaqstan Respýblıkasy Tuńǵysh Prezıdentiniń Mýzeıinde beıneleý jáne sándik-qoldanbaly óner týyndylarynyń «Qazaq handyǵy: Uly dalanyń uly beıneleri» atty qor kórmesiniń ashylý rásimi ótedi, dep habarlady mýzeıdiń baspasóz qyzmeti.
Ekspozıtsııa alǵash ret dástúrli qazaq qoǵamynyń tarıhı jáne mádenı muralaryn aıǵaqtaıtyn birneshe mýzeılik jınaqtardy usynyp otyr.
Kórmeniń maqsaty qazaq memlekettiliginiń qalyptasýy men nyǵaıýynda mańyzdy oryn alǵan, Qazaq handyǵy tarıhyndaǵy aıtýly oqıǵalar men jarqyn tulǵalardy kórsetý.
Qazaq handyǵynyń keń baıtaq keskindemeli beınesin tanymal qazaqstandyq sýretshiler, músinshiler, zergerler, jańǵyrtýshylar týyndylary kóz aldymyzǵa elestetedi.
Ekspozıtsııada birqatar tarıhı jádigerlikter - Reseı patshaıymy І Elızavetanyń atynan Abylaı hanǵa tartý etilgen ataqty qylyshtyń bóligi, Bólek batyrdyń dýlyǵasy, sonymen qatar Q. Altynbekovtyń tarıhı dáldikpen oryndaǵan qazaq handarynyń mór-júzikteri men A. Abdýbaıttiń altyn zerli jippen kestelengen kórkem pannolary mańyzdy oryn alady.
Kóptegen jádigerler kópshilik qaýymǵa alǵash ret usynylyp otyr. Osylardyń qatarynda Qytaılyq Tsın dınastııasynyń kezeńine jatatyn biregeı pannolar mańyzdy oryn alady. Olarda qytaı ımperatorlardyń ártúrli memleket ókilderimen dıplomatııalyq syılyq almasý rásimi beınelengen. Osy dıplomattar qatarynda Qazaq handyǵynyń da ókilderi bar. Osyndaı biregeı, muraǵattyq-beıneleý derekkózderi QHR muraǵattarynan tabylǵan, al olardyń dál kóshirmeleri QHR-daǵy QR Tótenshe jáne Ókiletti Elshisi, qazirgi kezde Prezıdenttiń Kómekshisi-QR Qaýipsizdik Keńesiniń Hatshysy N.B. Ermekbaevtyń bastamasymen jasalǵan bolatyn.
«...Qazaq memlekettiliginiń tarıhynyń ómir súrý kezeńi jıyrmasynshy ǵasyrdyń sheginen asyp túsedi...», - dep atap ótken bolatyn N.Á. Nazarbaev «Tarıh tolqynynda» atty eńbeginde. Qazaq handyǵynyń tarıhy men murasyn zertteý táýelsizdikke qol jetkizgennen keıin ǵana múmkin boldy. Qazaq handyǵynyń mereıtoıyn atap ótýdegi basty nazar ulttyq biregeılik, tarıhı bastaýlardy izdeýge arnalyp otyr. Ekspozıtsııa Mýzeıdiń Kúmbezdi zalynda ornalasýy sımvol mándi: sebebi dál osy jerde 1997 jyly QR Tuńǵysh Prezıdenti Qazaqstannyń jańa astanasyn jarııa eteken bolatyn. Kúmbezdi zaldyń ózi de Qazaqstan halqynyń erkindigi, birligi jáne onyń sabaqtastyǵynyń rýhyna tunyp tur.
«Qazaq handyǵy: Uly dalanyń uly beıneleri» atty kórme 2015 jyldyń 28 qyrkúıegine deıin jalǵasady.
