Astanada «Qazaq halqynyń salt-dástúrleri» kitaby tanystyryldy (FOTO)
Memleketimiz rýhanııat salasyn qoldaýǵa aıryqsha basymdyq retinde qaraıtyny belgili. «Mádenı mura» memlekettik baǵdarlamasy aıasynda atqarylǵan sharýalardyń ózi ushan-teńiz. Bıyl Qazaq handyǵynyń 550 jyldyǵy atalyp ótetini de tarıh pen mádenıetke degen memlekettik kózqarastyń ereksheligin bildiredi.
Qazaqstan Respýblıkasynyń Prezıdenti Nursultan Nazarbaevtyń «Qazaqstan-2050» strategııasy - qalyptasqan memlekettiń jańa saıası baǵyty» atty Qazaqstan halqyna Joldaýynda mynadaı joldar bar: «Dástúr men mádenıet - ulttyń genetıkalyq kody. Patshalyqtyń, tóńkeris dúmpýi men totalıtarızmniń barlyq aýyrtpalyǵy men qıynshylyqtaryna qaramastan, bizdiń elimizdiń aýmaǵynda turatyn qazaqtar jáne basqa da halyqtardyń ókilderi ózderiniń mádenı erekshelikterin saqtaı aldy. Táýelsizdik jyldarynda, jahandaný men vesterndenýge qaramastan, bizdiń mádenı irgetasymyz bekı tústi. Qazaqstan - biregeı el. Bizdiń qoǵamda ártúrli mádenı elementter bir-birimen birikken jáne birin-biri tolyqtyryp turady, birine-biri nár berip turady».
«Qazaqstan Respýblıkasynyń Tuńǵysh Prezıdenti - Elbasynyń kitaphanasy» MM atqarýshy dırektory Beısembaı Jumabekov sharanyń mańyzyna bylaısha toqtaldy: «Bizdiń mekememiz Elbasy kitaphanasy bolǵandyqtan, rýhanııatty qoldaý is-sharalaryna erekshe mán beremiz. Tehnologııanyń qaryshtap damyǵan, jappaı jahandaný zamanynda ulttyq naqyshtaǵy shyǵarmashylyq ókilderi nazardan tys qalmaýy tıis. Óıtkeni olar bizdiń qanshama ǵasyrlyq tól órkenıetimiz, mádenıetimiz, dúnıetanymymyz bolǵanyn ózgelerge de, ózimizge de muqııat tanystyrady. Keler urpaq osy eńbekter negizinde sabaqtastyǵymyzdy saqtaı alady. Bul baǵytta «Qazaq halqynyń salt-dástúrleri» syndy eńbekterdiń mańyzy zor».
«Óneri qazaqtyń tereńde jatqan tarıhy men baı mádenı murasynan bastaý alatyn sýretshi ári jazýshy Eraly Ospanulynyń shyǵarmalarynyń basty qasıeti - ótkendi búgingi tilmen sóılete bilýinde. Osy kitap - sonyń taǵy bir aıǵaǵy. Avtordyń bul shyǵarmasynyń elge tıgizer paıdasy tipti ólsheýsiz, ásirese halqymyzdyń dástúrli mádenıetinen túrli sebeptermen ajyrap qalǵan qandastarymyz úshin taptyrmas dúnıe», dedi atalǵan kitap týraly belgili arheolog, tarıh ǵylymdarynyń doktory Zaınolla Samashev.
Bul - tolyqtyrylyp ekinshi ret basylyp otyrǵan kitap. Oǵan qazaqtardyń dástúrli ádet-ǵuryptaryna qatysty 90 sýret engizildi. Grafıkalyq týyndylardyń árqaısysyna qysqasha sıpattamasy qosa berilgen. Onda kórsetilgen salt kóshpeli halyq úshin qanshalyqty mańyzdy ekeni jazylady.
Tusaýkeser sharasyna memleket qaıratkerleri, dıplomatııalyq qyzmet ókilderi, rýhanııat qaıratkerleri, metsenattar men kásipkerler qatysty. Kópshilikti avtordyń buǵan deıin de joǵary baǵalanyp úlgergen ulttyq naqyshtaǵy shyǵarmalary aıryqsha qyzyqtyrdy.
«Qazaq halqynyń salt-dástúrleri» kitabynyń jaryq kórýine ORDA INVEST ınvestıtsııalyq-qurylys korporatsııasy qarjylaı qoldaý kórsetken.
Kitap avtory Eraly Ospanuly Shymkenttegi Óner mektebin, keıin Á.Qasteev atyndaǵy óner ýchılışesin bitirgen. Mamandyǵy - sýretshi-bezendirýshi. Kóne gravıýralar men fotosýretter negizinde jasalǵan grafıkalyq týyndylardyń avtory. Onyń eńbekteri Qazaqstanmen qatar shet elderde de moıyndalǵan. E.Ospanulynyń grafıkalary «Sotbıs», «Krıstıs» álemdik aýktsıon úılerinde birneshe ret qoıylǵan.
