Astanada «Qazaq eli» monýmenti qaıta jóndelip jatyr
ASTANA. QazAqparat - Astana qalasyndaǵy «Qazaq eli» monýmentinde aldaǵy bir aptada jóndeý jumystary bastalyp, qala kúnine deıin aıaqtaý josparlanyp otyr, dep habarlaıdy QazAqparat Elorda Infoǵa silteme jasap.
«Qazirgi ýaqytta konkýrstyq rásimder ótip jatyr. Jaqyn kúnderi merdiger uıym anyqtalyp, monýmenttiń artyndaǵy baǵandaryna jóndeý jumystary bastalady. Monýmenttiń ózi qalalyq Mádenıet jáne sport basqarmasynyń birliginde. Kolonnadanyń jóndeýin qala kúnine deıin aıaqtaımyz. Shamamen bir aptadan soń bul jerde jóndeý jumystary bastalady», - dedi Almaty aýdany ákimdiginiń abattandyrý jáne ınfraqurylymdy damytý bóliminiń jetekshisi Rýslan Oralov.
Onyń aıtýynsha, jóndeý kezinde baǵandardaǵy qulaǵaly turǵan mármár tastar jańasyna almastyrylady.
«Kolonnadanyń keıbir jerindegi mármár tastar qulap qalǵan. Endi biri qulaǵaly tur. Al sý burqaqtardaǵy granıtti qaptaýǵa kelsek, onyń barlyǵy qalpyna keltirildi», - ol.
Aıta keteıik, buǵan deıin áleýmettik jelilerde «Qazaq eli» monýmenti alańyndaǵy tastardyń qulap jatqany týraly qyzý talqyǵa túsken bolatyn. Belgili bolǵandaı, alańnyń bir bóligi Almaty aýdanynyń ákimdigine, endi bir bóligi «Shabyt» shyǵarmashylyq saraıyna jáne bir bóligi «Táýelsizdik» saraıyna qaraıdy.
«Bizdiń barlyq qujattarymyz daıyn. Kelesi aptada kelisimge qol qoıamyz. Barlyq eskertýdi joıýǵa qajetti qarjy bólindi. 1 maýsymǵa deıin barlyq aqaýdy jónge keltiremiz. Shamamen 400 sharshy metr qabyrǵadaǵy keramogranıt pen 700 sharshy jer tósemderin jańartý kózdelip otyr. Keı jerlerde granıt shytynap, jarylǵan jáne qulap qalǵan jerler bar, bári reteletin bolady», - dedi Táýelsizdik saraıy dırektorynyń orynbasary Dýlat Qojahmetov.
Onyń aıýtynsha «Táýelsizdik» saraıy ótken jyly ǵana jóndeý jumysyn júrgizgen.
«Sońǵy ret jóndeý byltyr alańnyń basqa ýchaskesine jasaldy. Bizdiń aýmaǵymyz óte úlken. Alań úlken. Byltyr shamamen 500 sharshy metr qabyrǵa men 300 jer tósemin jóndedik. Bıylǵy jóndeýge 58 mln teńge bólinip otyr. Bul aqshaǵa barlyq problemalyq jerlerdi jónge keltiretin bolamyz», - dedi D.Qojahmetov.
Al «Shabyt» shyǵarmashylyq saraıy «Qazaq eli» alańyndaǵy ózine tıesili aýmaqty jóndeýge 3 mln teńge bólýdi kózdep otyr.
«Bizdiń problemamyz bar. Negizinen ol qar jınaıtyn kólikter men tıeýishterdiń saldarynan týyndaǵan problema. Jyl saıyn qaıtalanady jáne qalpyna keltirý jumysy júrgiziledi. Buǵan deıin ákimdik qarjylandyryp, birlesip jumys istegen edik. Endi óz esebimizden jóndeıtin bolamyz. Bizde jalpy 148 sharshy metr keramogranıt zaqymdaldy. Áleýetti qyzmet kórsetýshi anyqtalysymen kelisim jasaımyz. Ol osy aptanyń sońyna deıin anyqtalýy kerek. Qazir qaıta montajdaý jumysy bastalyp ketti. Bizdiń aýmaqtaǵy problemalardy mamyr aıynyń sońyna deıin joıýmyz», - dedi «Shabyt» shyǵarmashylyq saraıynyń ákimshilik sharýashylyq qyzmeti jetekshisiniń orynbasary Dinmuhamed Túımebaev.
