Astanada Qazaq drama teatry salynatyn oryn belgili boldy
ASTANA. QazAqparat - Astanada Qazaq drama teatrynyń jańa ǵımaraty salynatyn jer anyqtaldy, dep habarlaıdy QazAqparat.
Qazaq drama teatrynyń jańa ǵımaraty qalanyń Almaty aýdanyndaǵy № 23-15 kóshe (jobalyq ataýy), A.Baıtursynuly jáne J.Nájimedenov kósheleriniń arasynda salynady. Osy mańdaǵy 47 jer telimi 2019 jyldyń 18 maýsymynan 2020 jyldyń 18 maýsymyna deıin memleket qajettiligi úshin qaıtarylyp alynýy kerek.
«Ýchaskeler «Obektilerdi salý boıynsha kompanııasy» korporatıvtik qorǵa qosa berilip otyrǵan syzbaǵa jáne qosymshaǵa sáıkes zertteý, izdestirý jáne Qazaq drama teatryn jobalaý jumystaryn júrgizý úshin berilgen», - delingen Astana ákimdiginiń 2019 jyldyń 13 naýryzyndaǵy 510-382 qaýlysynda.
Menshik ıelerine jáne jer paıdalanýshylarǵa memleket muqtajy úshin jer ýchaskeleri jáne basqa jyljymaıtyn múlik aldaǵy ýaqytta ıelikten shyǵarylatyndyǵy týraly jazbasha habarlama joldanady. Habarlama alǵan sátten bastap bir aı ishinde ákimdikke tıisti ótinish berý jolymen kelisim rásimderine bastama jasaýǵa quqyly.
Qaýlynyń oryndalýyn baqylaý Astana qalasy ákiminiń orynbasary A.Ámrınge júkteldi.
Eske sala ketsek, 2017 jyly QR Mádenıet jáne sport mınıstri Arystanbek Muhamedıuly teatr ǵımaratyn salýǵa oryn belgilengenin, alaıda ol halyqtyń kelýine yńǵaısyz bolǵandyqtan ári kólik jolynyń qajettiligine oraı basqa jerge aýystyrylǵanyn málim etken edi.
