Astanada «Qazaq arýy» baıqaýy ótedi

ASTANA. QazAqparat - 19 naýryz kúni Astanadaǵy Beıbitshilik jáne kelisim saraıynda «Qazaq arýy-2019» ulttyq sulýlyq baıqaýy ótedi. Bul shara Astana qalasy ákimdiginiń qoldaýymen osymen úshinshi ret ótkeli otyr, dep habarlaıdy QazAqparat qalalyq mádenıet jáne sport basqarmasyna silteme jasap.

Uıymdastyrýshylardyń aıtýynsha, konkýrsqa qatysýǵa barsha Qazaqstannan 16-22 jas aralyǵyndaǵy 600-den asa arý ótinim bergen. Baıqaý sharttaryna sáıkes, «Qazaq arýy» atanýǵa úmitkerler qazaq tilinde erkin sóılep, ádebıet, tarıh salalaryn, qazaq halqynyń salt-dástúrleri men ádet-ǵuryptaryn bilýge tıis. Budan basqa, konkýrsanttar symbatty, burymdy, al boıy keminde 170 sm bolýy kerek.

«Qazaq arýy-2019» baıqaýynyń baǵdarlamasy úsh kezeń boıynsha ótedi - shyǵarmashylyq, ıntellektýaldyq baıqaý jáne qazaqstandyq dızaınerler kıimderiniń kórsetilimi (defıle). Arýlar bir jarym aıdan beri kásipqoı mamandar - horeograftar, rejısserler, dızaınerler, vızajıster men stılısterdiń kómegimen baıqaýdyń fınalyna daıyndalyp júr.

«Qazaq arýyn» anyqtaý úshin ádil qazylar alqasy belgilendi, onyń quramynda Aıgúl Mýkeı, Dınara Satjan, Qaraqat Ábildına, Bolat Majaǵulov, Erik Joljaqsynov, Arman Seıtmamyt, joba prodıýseri Baıan Alagózova, «Qazaq arýy-2018» gran-prı ıegeri Nabıra Raqymjan jáne taǵy basqa tanymal azamattar bar. Qazylar alqasynyń tóraıymy - QR Parlamenti Senatynyń depýtaty, qoǵam qaıratkeri Birǵanym Áıtimova.