Astanada qazaq álipbıiniń latynsha nusqasy tanystyryldy
ASTANA. 22 sáýir. QazAqparat - Búgin Astanada «Túrki memleketteriniń latyn grafıkasyna kóshý tájirıbesi jáne álipbı reformasynyń qazaqstandyq joly» taqyrybynda ǵylymı semınar ótti.
Semınarda A. Baıtursynuly atyndaǵy Til bilimi ınstıtýtynyń jetekshi ǵylymı qyzmetkeri, fılologııa ǵylymdarynyń doktory, professor Júnisbek Álimhan, L.N. Gýmılev atyndaǵy Eýrazııa ulttyq ýnıversıteti janyndaǵy «Jasandy zerde» ǵylymı-zertteý ınstıtýtynyń dırektory, tehnıka ǵylymdarynyń doktory, professor Altynbek Sháripbaı jáne basqa da ǵalymdar baıandama jasap, ortaq latyn álipbıin túrki tilderine engizý men paıdalanýdyń ózekti máselelerin naqtylaý men sheshý joldaryn qarastyrý boıynsha óz oılaryn ortaǵa saldy.
«Klassıkalyq latyn álipbıinde 26 tańba, al qazirgi qazaq álipbıinde 42 árip bar. Olardyń barlyǵyn belgileý úshin biz klassıkalyq latyn álipbıine qosymsha tańbalar qosýǵa májbúrmiz. Tehnıkanyń kún saıyn jańaryp otyrǵan myna zamanynda ondaı qosymsha tańbalardy árbir kompıýterge, árbir uıaly telefonǵa engizý qyrýar qarajatty qajet etedi. Sondyqtan biz álipbıimizdi qazaq tiliniń negizgi zańdylyqtaryna zııan keltirmeıtindeı etip, barynsha shırata túsýimiz qajet»,- degen professor A. Sháripbaı, ózi basqaratyn ınstıtýt ázirlep shyǵarǵan jobany usyndy.
Semınar jumysyna QR Parlamenti Senatynyń depýtattary, QR Bilim jáne ǵylym mınıstrliginiń ókilderi, Túrkitildes memleketterdiń resmı ókilderi men ǵalymdary qatysty. Sharany Halyqaralyq túrki akademııasy uıymdastyryp otyr.
