Astanada qazaq ádebıetiniń klassıgi Ǵ.Músirepovtyń týǵanyna 110 jyl tolýyna arnalǵan ádebı kesh ótýde
ASTANA. 18 sáýir. QazAqparat - Búgin Astanadaǵy Ulttyq akademııalyq kitaphanada qazaq ádebıetiniń klassıgi, akademık- jazýshy Ǵabıt Músirepovtyń týǵanyna 110 jyl tolýyna arnalǵan «Kemeńger qalamnyń qudireti» taqyrybynda ádebı kesh ótýde.
Atalmysh sharaǵa elimizge tanymal aqyn, jazýshylar men ǵalymdar qatysýda. Keshte jazýshy, memleket jáne qoǵam qaıratkeri, dramatýrg, aýdarmashy, ádebı synshy, Qazaqstan ǵylym akademııasynyń akademıgi, Memlekettik syılyqtyń laýreaty Ǵ.Músirepovtyń ómir joly men shyǵarmashylyǵy týraly túsirilgen kórkem týyndylar kórsetildi.
Búgingi sharaǵa sonymen qatar kitaphana qyzmetkerleri arnaıy daıyndaǵan Ǵ.Músirepov pen onyń shyǵarmashylyǵy týraly jazylǵan kitaptar men ózge de shyǵarmalardyń kórmesi tamashalanýda. Keshti jazýshy-pýblıtsıst, QR Prezıdenti syılyǵynyń, Abaı atyndaǵy Halyqaralyq ádebıet syılyǵynyń ıegeri, Halyqaralyq televızııa jáne radıo akademııasynyń akademıgi, Qazaqstannyń eńbek sińirgen Mádenıet qaıratkeri, Sultan Orazaly júrgizip, klassık jazýshynyń týyndylary men qazaqtyń shyǵarmashylyq ónerine sińirgen eńbekteri jóninde áńgimeledi. Sondaı-aq fılologııa ǵylymdarynyń doktory, professor Serik Negimov, jazýshy Ákim Tarazı syndy Ǵ.Músirepovtyń kózin kórgen zamandastary da onyń adamgershilik qasıetteri jónindegi oı-pikirlerimen bólisti.
«Búgin qazaqtyń asa kórnekti klassık jazýshysy - Ǵ.Músirepovtyń týǵanyna 110 jyl toldy. Men ómirde ol kisiniń jaqsylyqtaryn kóp kórdim. Meniń jazýshy bolǵanyma, meniń Ákim Tarazı bolǵanyma birden-bir sebi tıgen azamat - Ǵ.Músirepov»,- dep eske alady jastyq shaǵyn jazýshy Á.Tarazı.
Onyń aıtýynsha, qazaqtyń ataqty klassıkalyq kınotýyndysy «Qyz Jibek» fılmi stsenarııiniń avtory Ǵ.Músirepov ekendigin ekiniń biri bile bermeıdi. «Jalpy Ǵabeń kózi tirisinde talantty jastarǵa óte kóp kóńil bólip, kóp jaqsylyq jasady. Meni Máskeýge oqýǵa jibergen Ǵabeń. Oljas Súleımenov, Qalıhan Ysqaqov, Saıyn Muratbekov sııaqty óz zamanynyń zańǵar tulǵalaryn da Máskeýge jiberip oqytqan osy Ǵabeń edi. Bizdiń bala kezimizde, jas kezimizde balasha erkeletip, kitaptarymyzdy shyǵaryp, Jazýshylar Odaǵyna alyp kelgen de Ǵabeń. Sondyqtan ol kisi búkil qazaq ádebıetiniń qamqorshysy deýge bolady», - deıdi jazýshy Á.Tarazı.
