Astanada KazAgroFarm-2026 halyqaralyq agrarlyq kórmesi ashyldy
ASTANA. KAZINFORM — Astanada 17-shi halyqaralyq agrarlyq kórme — KazAgroFarm-2026 óz jumysyn bastady. Kórmege álemniń 25 elinen 350-den astam kompanııa qatysyp jatyr. ExpoGroup kompanııasy uıymdastyrǵan is-shara ozyq tehnologııalardy tanystyrýǵa, tájirıbe almasýǵa jáne agroónerkásiptik keshen salasyndaǵy halyqaralyq yntymaqtastyqty nyǵaıtýǵa múmkindik beretin mańyzdy alańǵa aınaldy.
Kórmeniń ashylý saltanatyna Aýyl sharýashylyǵy vıtse-mınıstri Azat Sultanov qatysty. Sondaı-aq Lıvııa men Chehııanyń aýyl sharýashylyǵy mınıstrleri, Irannyń aýyl sharýashylyǵy vıtse-mınıstri, Germanııa, Kanada, Nıderland, Ispanııa jáne Qytaıdan kelgen halyqaralyq sarapshylar delegatsııalary, agrobıznes ókilderi men fermerlik sharýashylyqtardyń basshylary qatysty.
Ashylýda sóz sóılegen Azat Sultanov Aýyl sharýashylyǵy mınıstrliginiń jáne jeke óz atynan joǵary deńgeıdegi is shara úshin uıymdastyrýshylarǵa alǵys bildirdi.
– Búginde Astana álemdik agrarlyq qaýymdastyqtyń basyn qosatyn ortalyqqa aınaldy. KazAgroFarm — salanyń jetistikterin tanystyratyn jaı ǵana kórme emes, tájirıbe almasýǵa, ozyq sheshimderdi engizýge jáne uzaq merzimdi seriktestik ornatýǵa múmkindik beretin halyqaralyq alań. Qatysýshy elder aýmaǵynyń keńeıýi Qazaqstannyń agrarlyq áleýetine degen qyzyǵýshylyqtyń joǵary ekenin kórsetip, halyqaralyq yntymaqtastyqty damytýdyń jańa múmkindikterine jol ashady, - dedi vıtse-mınıstr.
Onyń aıtýynsha, basty maqsat-azyq-túlik qaýipsizdigin qamtamasyz etý, eńbek ónimdiligin arttyrý jáne otandyq ónimniń básekege qabilettiligin kúsheıtý.
– Bizdiń strategııalyq maqsatymyz — Qazaqstannyń agroónerkásiptik keshenin tehnologııalyq turǵydan damyǵan, tıimdi ári ornyqty salaǵa aınaldyrý. Ol úshin ósimdik sharýashylyǵy men mal sharýashylyǵyna zamanaýı sheshimderdi engizý, tsıfrlandyrýdy, avtomattandyrýdy jáne dálme-dál eginshilikti damytý, ınvestıtsııalyq jáne halyqaralyq yntymaqtastyqty keńeıtý qajet. Kórme jańa birlesken jobalardy iske qosýǵa, ózara tıimdi kelisimder jasaýǵa jáne elimizdiń eksporttyq áleýetin nyǵaıtýǵa yqpal etedi dep senemin, - dep atap ótti Azat Sultanov.
KazAgroFarm-2026 kórmesin ótkizý halyqaralyq iskerlik baılanystardy nyǵaıtýǵa, ınnovatsııalardy ilgeriletýge jáne Qazaqstannyń agroónerkásiptik keshenin ornyqty damytýǵa jańa múmkindikter ashýǵa yqpal etedi.
Kórme ekspozıtsııasy dástúrli túrde agrarlyq salanyń eki negizgi baǵytyn qamtıdy. KazAgro baǵyty tuqym men ósirý tehnologııalarynan bastap, egin jınaý jáne ónimdi saqtaýǵa deıingi ósimdik sharýashylyǵynyń tolyq óndiristik tsıklin qamtıdy. Al KazFarm baǵyty mal sharýashylyǵyna arnalǵan sheshimderdi usynady. Olardyń qatarynda genetıka, asyl tuqymdy mal ósirý, et pen sút óndirý jáne daıyn ónim shyǵarý baǵyttary bar.
Kórmede tsıfrlandyrýǵa, avtomattandyrýǵa, jasandy ıntellektke, robottandyrýǵa jáne dálme-dál eginshilik tehnologııalaryna erekshe nazar aýdarylady.
Qatysýshylar aýyl sharýashylyǵy tehnıkasy men jabdyqtarynyń jańa úlgilerin, sondaı-aq ózderiniń tehnologııalyq ázirlemelerin tanystyrady.
Kórmeniń basty oqıǵalarynyń biri — qazaqtyń aqbas sıyr tuqymynyń 75 jyldyǵyna arnalǵan «Aqbas» qazaqtyń aqbas sıyr tuqymy kúni. Sonymen qatar agroónerkásiptik keshendi damytýdyń ózekti máselelerine arnalǵan paneldik sessııalar, semınarlar, konferentsııalar jáne kásibı kezdesýler ótkizý josparlanǵan.
Qazaqstandyq fermerler úshin kórme sharýashylyqtardy damytýǵa arnalǵan zamanaýı sheshimdermen tanysýǵa, óndirýshilermen jáne sarapshylarmen tikeleı baılanys ornatýǵa, jańa tehnologııalardy zerdeleýge ári áleýetti seriktester tabýǵa múmkindik beredi.
Aıta keteıik, ShYU aıasynda tsıfrlyq júk tasymaly platformasy qurylady.
