Qaza tapqan qutqarýshy Asqar Zabıkýlınge Astanada eskertkish ornatyldy
Elordada erlikpen qaza tapqan qutqarýshy Asqar Zabıkýlınge № 6 Mamandandyrylǵan órt sóndirý bóliminiń aýmaǵynda ornatylǵan eskertkishtiń saltanatty ashylýy ótti, dep habarlaıdy Kazinform.
«Árbir adamnyń ómiri baǵa jetpes qundy, memlekettiń strategııasy eń aldymen, azamattardy qorǵaýǵa, tótenshe jaǵdaılardyń aldyn alýǵa jáne joıýǵa baǵyttalǵan. Sol sebepti qutqarýshylar men órt sóndirýshilerdiń eńbegi asa mańyzdy bolyp tabylady. Bul eskertkish – Asqardyń ójettiginiń, janqııarlyǵy men adaldyǵynyń belgisi. Búgin bizdiń kóńilimiz túsip, qaıǵyryp, sonymen qatar barlyǵymyz úshin úlgi bolatyn erlikke degen sheksiz qurmetpen pen tańdanýǵa kýá bolyp turmyz. Onyń jasaǵan erligi azamattarymyzdyń qaýipsizdigi jolyndaǵy kúreste bizderge kúsh pen qýat beretin úlgi bolsyn.
Asqar Zabıkýlın bizdiń áriptesimiz ǵana emes, súıikti ul, jar jáne áke boldy. Onyń ómirden ótýi bizdiń júregimizge jazylmas jara saldy. Biz ony árqashan eńbekqor, aqyldy jáne súıispenshilikke toly adam retinde este saqtaımyz», - dep atap ótti Tótenshe jaǵdaılar mınıstri Syrym Sháriphanov.
Eskertkish taqtadan aq jamylǵyny alyp tastaǵannan keıin, jınalǵandar memorıalǵa gúl shoqtaryn qoıyp, marqumdy bir mınýt únsizdikpen eske aldy.
Bıiktigi úsh metr bolatyn eskertkishte Askardyń bıýsti qoladan, al tómengi bóligi mármárdan jasalǵan.
Saltanatty sharaǵa, sondaı-aq elorda ákimi Jeńis Qasymbek, garnızon basshylyǵy men jeke quramy, azamattyq qorǵaý organdarynyń ardagerleri, A. Zabıkýlınniń týystary men jaqyndary qatysty.
Keshe Astananyń Úrker shaǵyn aýdanynda órt sóndirýshi Asqar Zabıkýlınniń esimi berilgen kósheniń ashylýy ótken bolatyn.
Eske salaıyq, 2022 jyldyń 16 qarashasynda elordadaǵy 15 qabatty úıden órt shyqty. Saldarynan 3 adam, onyń ishinde bir bala aýrýhanaǵa tústi. Birneshe adamdy qutqarǵan órt sóndirýshi Asqar Zabıkýlınniń denesin 80% kúıik shalyp, jansaqtaý bólimine jatqyzyldy. 20 qarashada ol astanalyq aýrýhanada qaıtys boldy. Dárigerler onyń ómiri úshin birneshe kún kúresken bolatyn.
Memleket basshysy erlik kórsetken jáne birneshe adamnyń ómirin qutqarǵan elordalyq órt sóndirýshilerdi Qazaqstan Respýblıkasynyń memlekettik nagradalarymen marapattaý týraly Jarlyqqa qol qoıdy.
Asqar Zabıkýlın I dárejeli «Aıbyn» ordenimen marapattaldy. 20 jeltoqsanda oǵan «Altyn adam» syılyǵy tabys etildi.
28 jeltoqsanda Astana qalalyq máslıhaty sheshimimen erlikpen qaza tapqan órt sóndirýshi Asqar Zabıkýlınniń esimi jańa kóshege berildi.
