Astanada «Kaz Agro&Kaz Farm» aýyl sharýashylyǵy kórmeleri ótip jatyr
ASTANA. KAZINFORM - Elordada 20-24 qazan kúnderi aralyǵynda «Kaz Agro&Kaz Farm» aýyl sharýashylyǵy kórmeleri ótip jatyr. 15 jyl boıy ótkizilip kele jatqan kórme - sala kásipqoılaryn biriktirip, tájirıbe almasý men ınnovatsııalar úshin erekshe alań bolyp tabylady, dep habarlaıdy QR AShM baspasóz qyzmeti.
Mundaı is-sharalardy ótkizý salanyń damýyna eleýli úles qosady. Bıylǵy jylǵy is-sharanyń seriktes eli bolyp Germanııa tańdaldy, ol 40-tan astam kompanııasymen eń jańa ónimderi men tehnologııalaryn usynyp otyr.
«Búgin munda álemniń 30 elinen 250-den astam aýyl sharýashylyǵy kesheniniń jetekshi kompanııalary jınaldy.
Kórmeniń uıymdastyrýshylary dástúrli túrde bizge óndirýshiler, óńdeýshiler, kórmege qatysýshy elder úshin paıdaly bolatyn baısaldy bıznes baǵdarlamasyn daıyndaǵanyna senimdimin, bul jalpy salanyń odan ári damýyna yqpal etedi.
Qazaqstan Ortalyq Azııada aýyl sharýashylyǵyn damytýdaǵy kóshbasshylardyń biri. Jyl saıyn biz 20 mıllıard dollarǵa jýyq aýyl sharýashylyǵy ónimderin jáne 6 mıllıard dollarǵa jýyq óńdeý ónimderin óndiremiz. Tamaq ónimderiniń negizgi túrleri boıynsha azyq-túlik qaýipsizdigi qamtamasyz etilgen.
AÓK ónimderiniń jyl saıynǵy eksporty 5 mıllıard dollardan asady. Bizdiń maqsatymyz aldaǵy bes jylda ony 10 mıllıard dollarǵa jetkizý.
Jalpy alǵanda, sońǵy 5 jylda aýyl sharýashylyǵynyń negizgi kapıtalyna ınvestıtsııa kólemi eki esege jýyq artty jáne 2023 jyly 2,2 mıllıard dollardy qurady, bul aýyl sharýashylyǵy sektorynyń sheteldik ınvestorlar úshin tartymdylyǵy artyp kele jatqanyn dáleldeıdi», - dep atap ótti aýyl sharýashylyǵy vıtse-mınıstri Amanǵalı Berdalın óziniń quttyqtaý sózinde.
Sonymen qatar, jıynda ýaqytsha senimdi ókil Ýlrıh Kınne jáne «ExpoGroup» JShS dırektory Sholpan Kojabaeva quttyqtaý sózderin aıtty.
Kórmede otandyq selektsııalyq tuqymdar, zamanaýı tehnologııalar, aýyl sharýashylyǵy ónimderin saqtaý, óńdeý jáne logıstıka úshin tehnıka, barlyǵy 300-ge jýyq eksponat usynylǵan. Innovatsııalarǵa erekshe nazar aýdarylǵan, olar kez kelgen sektorda qozǵaýshy kúsh bolyp tabylady.
Sondaı-aq, kórmeniń bıznes baǵdarlamasynda semınarlar, prezentatsııalar jáne baıqaýlar ótkizý josparlanǵan.
Aıta keteıik, is-shara aýyl sharýashylyǵy sektoryndaǵy jetistikterdi kórsetý, agrobıznes ókilderin bıznespen sátti aınalysý úshin qajetti baılanystar men bıznes baılanystarymen qamtamasyz etý, problemalardy talqylaý, sheshimder izdeý jáne bıznes-kezdesýler ótkizý úshin ártúrli dıalog alańyn usyný, qatysýshylardyń brendteri men ónimderin nasıhattaý maqsatynda «ExpoGroup» uıymdastyrǵan.
