Astanada qaıyrymdylyq keshi ótip jatyr
ASTANA. QazAqparat - Elordada alǵash ret uıymdastyrylǵan qaıyrymdylyq grand balyna 150 debıýtant qatysýda, dep habarlaıdy QazAqparat tilshisi.
Qaıyrymdylyq sharasyna Astananyń 18 ben 29 jas aralyǵyndaǵy jastary qatysýda, olardyń arasynda kásibı bıshi, ustaz, áskerı jáne erekshe kútimdi talap etetin jandar da bar.
Bal aıasynda «Ardagerlerdi ardaqtaıyq», «Júrekten júrekke», «Aqjarqyn Astana» degen ataýmen arnay sharalar uıymdastyrylyp, qatysýshylar elordadaǵy áleýmettik mekemelerdi aralady.
«Atalǵan shara ártúrli saladaǵy elordalyq jastardyń bastaryn biriktirýde. ıAǵnı jastar úshin beıresmı qarym-qatynas pen ıdeıalar almasatyn jaqsy múmkindik alańy. Maqsaty - jastardy qaıyrymdylyq isine baýlý. Qatysýshylar balda bılep qana qoımaı, qaladaǵy qarttar jáne balalar úılerine baryp óz kómekterin kórsetti. Qaıyrymdylyq balynyń ereksheligi sol, sharaǵa jastar óz erikterimen belsendi atsalysýda», - dedi Astana qalasy qoǵamdyq damý isteri basqarmasynyń basshysy Danııar Esın.
Onyń aıtýynsha, atalǵan bal keshinen túsken qarajat turmysy tómen otbasylar men qarttar jáne balalar úıine baǵyttalady. Qaıyrymdylyq keshinde debıýtanttar barlyǵy 5 túrli bı bılep, sońynda baldyń hanshaıymy men hanzadasy anyqtalady.
Astananyń 20 jyldyǵyna arnalyp tuńǵysh ret ótkizilgen sharany elorda ákimdigi qoldap, Astana qalalyq qoǵamdyq damý isteri basqarmasy uıymdastyrýda.
