Astanada qaıtys bolǵan donordyń júregi 59 jastaǵy naýqasqa sátti transplantatsııalandy
ASTANA. KAZINFORM — Astanada qaıtys bolǵan donordyń júregin transplantatsııalaý operatsııasy sátti ótti. Sonyń arqasynda júrek aýystyrýdy uzaq ýaqyt kútken 59 jastaǵy patsıenttiń ómirin saqtap qalýǵa múmkindik týdy.
Densaýlyq saqtaý mınıstrliginiń málimetinshe, 14 shildeden 15 shildege qaraǵan túni Astananyń kópbeıindi medıtsına ortalyǵynda áleýetti donor anyqtalǵan. Marqumnyń týystary aǵza donorlyǵyna kelisim bergennen keıin Transplantattaý jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyq donorlyq úderisti uıymdastyrdy.
— Operatsııany UMC transplantologtary júrgizdi. Júrek 1966 jyly týǵan patsıentke sátti salyndy. Qazirgi tańda naýqastyń jaǵdaıy operatsııadan keıingi kezeńge sáıkes turaqty, — delingen habarlamada.
Mınıstrlik ókilderi donordyń otbasyna qabyldaǵan izgi sheshimi úshin alǵys aıtyp, donorlyq úderistiń sátti ótýine úles qosqan transplantologtarǵa, donorlyq aýrýhananyń dárigerlerine, sanıtarııalyq avıatsııa qyzmetkerlerine jáne barlyq medıtsına mamandaryna rızashylyǵyn bildirdi.
Vedomstvonyń málimetinshe, búginde Qazaqstanda ómirlik mańyzdy aǵzalardy transplantatsııalaýdy 4 739 adam, onyń ishinde 125 bala kútip otyr. Onyń ishinde 4 208 naýqasqa — búırek, 293 adamǵa — baýyr, 208 adamǵa — júrek, 30 adamǵa — ókpe jáne 5 adamǵa júrek-ókpe keshenin transplantatsııalaý qajet.
Eske salaıyq, buǵan deıin Premer-mınıstrdiń orynbasary — mádenıet jáne aqparat mınıstri Aıda Balaeva aǵza donorlyǵyna kelisim beretinin aıtqan edi.
