Astanada qaıtys bolǵan donordan júrek transplantatsııasy sátti jasaldy
ASTANA. KAZINFORM – Astanada qaıtys bolǵan donordan júrek transplantatsııasy sátti jasalyp, uzaq ýaqyttan beri donorlyq júrek kútken patsıenttiń ómirin saqtap qalýǵa múmkindik týdy, dep habarlaıdy Densaýlyq saqtaý mınıstrligi.
Mınıstrliktiń málimetinshe, 14 shildeden 15 shildege qaraǵan túni Astana qalasy ákimdiginiń «Kópbeıindi medıtsına ortalyǵy» ShJQ MKK bazasynda áleýetti donor anyqtalǵan. Donordyń otbasy kelisim bergennen keıin Densaýlyq saqtaý mınıstrliginiń Transplantatsııa jáne joǵary tehnologııalyq medıtsınalyq qyzmetterdi úılestirý jónindegi respýblıkalyq ortalyǵy donorlyq úderisti tolyq uıymdastyrǵan.
– UMC transplantologtar komandasynyń qatysýymen 1966 jyly týǵan patsıentke júrek transplantatsııasy sátti jasaldy. Qazirgi ýaqytta retsıpıenttiń jaǵdaıy operatsııadan keıingi kezeńge sáıkes keledi, – delingen mınıstrlik habarlamasynda.
Densaýlyq saqtaý mınıstrligi donordyń otbasyna qabyldaǵan izgi sheshimi úshin alǵys aıtyp, transplantatsııa úderisine qatysqan dárigerlerge, sanıtarııalyq avıatsııa qyzmetkerlerine jáne ózge de medıtsına mamandaryna rızashylyǵyn bildirdi.
– Qazirgi ýaqytta Qazaqstanda ómirlik mańyzdy aǵzalardy transplantatsııalaýdy 4 739 adam kútip otyr. Onyń ishinde 125-i – balalar. Atap aıtqanda, 4 208 patsıentke búırek, 293 adamǵa baýyr, 208 adamǵa júrek, 30 adamǵa ókpe jáne 5 adamǵa júrek-ókpe keshenin transplantatsııalaý qajet, – dep málimdedi vedomstvo.
Mınıstrliktiń atap ótýinshe, qaıtys bolǵannan keıin aǵza donory bolýǵa berilgen árbir kelisim – transplantatsııa ómirin saqtap qalýdyń jalǵyz múmkindigi bolyp otyrǵan jandar úshin úlken úmit. Osyǵan baılanysty vedomstvo transplantologııalyq qyzmetti damytý, donorlyq úılestirý júıesin jetildirý jáne qoǵamnyń aǵza donorlyǵynyń mańyzdylyǵy týraly aqparattanýyn arttyrý baǵytyndaǵy jumystardy jalǵastyrady.
Aıta keteıik, elordada donorlyq aǵzalardy saqtaýǵa arnalǵan jabdyq shyǵarylady.
