Astanada qaıtarylǵan aktıvter esebinen 1200 oqýshyǵa arnalǵan jańa mektep salynady
ASTANA. KAZINFORM – Arnaýly memlekettik qordan 7 mlrd teńge Astanada zamanaýı mektep salýǵa baǵyttaldy.
Memleket basshysynyń áleýmettik ınfraqurylymdy damytý jáne azamattardyń ómir súrý sapasyn arttyrý jónindegi tapsyrmasyn oryndaý aıasynda Úkimet áleýmettik mańyzy bar jobalardy júzege asyrýdy jalǵastyryp jatyr. Osy maqsatta Arnaýly memlekettik qordan 7 mlrd teńge Astanada zamanaýı mektep salýǵa baǵyttaldy.
1200 oqýshyǵa arnalǵan jańa bilim berý nysany elordanyń «Nura» aýdanynda boı kóterýde. Qazirgi ýaqytta nysanda qurylys-montaj jumystary júrgizilip jatyr. Jobany keler jyldyń sońyna deıin aıaqtaý josparlanǵan.
Mektep salý qajettiligi halyq sanynyń ósýine baılanysty týyndap otyr. Qazirgi ýaqytta qurylys aýmaǵynda 4 memlekettik mektep jumys isteıdi, alaıda oqýshy oryndarynyń tapshylyǵy bar. Jańa nysan elordadaǵy №84, №85, №89 jáne №97 mektepterge túsetin júktemeni azaıtýǵa múmkindik beredi.
Jalpy qaıtarylǵan aktıvter azamattar úshin praktıkalyq mańyzy bar jobalardy júzege asyrýǵa baǵyttalýda. Úkimet 610 mlrd teńgeden astam somaǵa 500-den astam áleýmettik jobany qarjylandyrýdy maquldady. Qarajat búkil el boıynsha bilim berý, densaýlyq saqtaý, sport jáne kommýnaldyq ınfraqurylym nysandaryn salýǵa jáne jańǵyrtýǵa bólinýde. Bilim berý salasynda jalpy quny 64,4 mlrd teńge bolatyn 17 jobany júzege asyrý maquldandy. Bul qarajat jańa bilim berý ınfraqurylymyn salýǵa jáne balalar men jastardyń bilim alýyna zamanaýı jaǵdaı jasaýǵa baǵyttaldy.
Aıta ketelik Almatyda qaıtarylǵan aktıvter esebinen 49,3 km sý jáne káriz jelisi jańartylǵan edi.
