Astanada Qaırat Boranbaevqa tıesili bolǵan fıtnes ortalyq 2,3 mlrd teńgege satyldy
ASTANA. KAZINFORM — Astanada buryn Qaırat Boranbaevqa tıesili bolǵan Fitnation fıtnes ortalyǵy 2,3 mlrd teńgege satyldy. Nysan 3 qarashada ótken elektrondy saýdada jańa ıesin tapty. Buǵan deıin onyń bastapqy baǵasy 30 paıyzǵa tómendetilgen.
Sport kesheni Turan dańǵyly, 4/1 mekenjaıynda ornalasqan. Saýdaǵa jalpy aýdany 4 043,4 sharshy metr ǵımarat pen oǵan japsarlas qurylystar, sondaı-aq 510 túrli jabdyq pen negizgi qural shyǵarylǵan. Olardyń arasynda jattyǵý zaldary, kardıojattyǵý aımaqtary, basseınder, SPA kesheni men keńselerge arnalǵan jabdyqtar bar.
Nysan alǵash ret 15 qazanda saýdaǵa qoıylǵan. Ol kezde baǵasy 2,91 mlrd teńge bolǵanymen, satyp alýshy tabylmaǵan.
Keıin bastapqy baǵasy 30 paıyzǵa arzandatylǵan. Nátıjesinde 3 qarashadaǵy saýdada keshen 2,3 mlrd teńgege satyldy.
Ony kim satyp alǵany ázirge belgisiz.
Jer telimi satylǵan múliktiń quramyna kirmeıdi. Jańa ıesi jerdiń qunyn kadastrlyq baǵalaý boıynsha bólek tóleýi kerek.
Saýda shartyna sáıkes, jańa ıesi bes jyl boıy keshenniń nysanaly maqsatyn ózgerte almaıdy. Ǵımarat sport, saýyqtyrý jáne ońaltý baǵytynda jumysyn jalǵastyrýy tıis.
Buǵan deıin Fitnation Astana ákimdigine qarasty «Dáýlet» memlekettik kommýnaldyq qazynalyq kásipornynyń balansynda bolǵan. Memleket menshigine ótken soń keshen erekshe qajettilikteri bar balalardy ońaltý úshin de paıdalanylǵan.
Aıta keteıik, buǵan deıin Astanada Qaırat Boranbaevtan tárkilengen qonaqúıdiń jekeshelendirilýi múmkin ekeni habarlanǵan edi.
