Astanada qaıyrymdylyq júgirý-festıvaline arnalǵan ashyq jattyǵýlar ótedi
ASTANA. KAZINFORM — Astanada 9 tamyz kúni ótetin Jüregımnıñ Jeñımpazy qaıyrymdylyq júgirý-festıvaline deıin barlyq nıet bildirýshilerge arnalǵan tegin ashyq jattyǵýlar ótip jatyr, dep habarlaıdy elorda ákimdiginiń resmı saıty.
Heart Center Foundation qoǵamdyq qory uıym qyzmetkerlerin, korporatıvtik komandalardy, júgirý áýesqoılaryn jáne tańdy belsendi ótkizip, mańyzdy áleýmettik bastamany qoldaǵysy keletin barlyq azamat jattyǵýlarǵa qatysa alady.
Jattyǵýlar ár senbi kúni saǵat 08:00-de Botanıkalyq baq aýmaǵynda («Syı» ınstallıatsııasynyń janynda) kásibı jattyqtyrýshylar men Qazaqstannyń tanymal sportshylarynyń jetekshiligimen ótedi.
Qatysýshylar júgirý tehnıkasy boıynsha usynystar alady, birlesken qyzdyrý jattyǵýlaryn oryndaıdy jáne dene daıyndyǵynyń deńgeıine qaramastan ózderi tańdaǵan qashyqtyqqa kezeń-kezeńimen daıyndalady.
Jüregımnıñ Jeñımpazy júgirý-festıvali jyl saıyn ómirlik mańyzdy aǵzalardy transplantatsııalaýdy kútip júrgen patsıentterdi qoldaý maqsatynda ótkiziledi. Ótken jyly oǵan 5 000-nan adam qatyssa, bıyl shamamen 7 000 qatysýshy keledi dep kútilip otyr.
Qatysýshylarǵa erekshe shabyt syılaıtyn jandardyń qatarynda aǵza transplantatsııasynan ótken adamdar da bar. Olardyń kópshiligi jyl saıyn jarys jolyna shyǵyp, operatsııadan keıin belsendi ómirge qaıta oralyp, sportpen shuǵyldanyp, jańa maqsattarǵa qol jetkizýge bolatynyn dáleldep keledi.
Aıta keteıik, aldaǵy jattyǵýlar 4 shilde, 11 shilde, 18 shilde, 25 shilde, 1 tamyz, 8 tamyz kúnderi Botanıkalyq baq, «Syı» ınstallıatsııasynyń janynda saǵat 08:00-de ótedi. Qatysý tegin bolmaq.
Osyǵan deıin Astanada dástúrli «Tolaǵaı» alyptar saıysy ótetinin jazǵan edik.
