Astanada qaı jerlerde jáne qashan muzdy sýǵa túsý rásimi ótedi
ASTANA. KAZINFORM – Elordada 18-19 qańtar kúnderi barlyq pravoslavıe shirkeýinde Kreşenıe merekesi rásimi ótedi, dep habarlaıdy elorda ákimdiginiń resmı saıty.
Astanada dástúrli shomylý rásimi qalalyq jaǵajaı mańynda bolady. Bul maqsatta arnaıy 4 oıyq daıyndalǵan.
18-19 qańtar kúnderi qalada merekelik dinı sharalar, krestpen sherý jáne jappaı shomylý uıymdastyrylady.
Іs-sharalar qaladaǵy barlyq pravoslavıe shirkeýinde ótedi: Ýspen soborynda (Kúıshi Dına kóshesi, 27), Konstantın-Elenın shirkeýinde (Respýblıka dańǵyly, 12), Sarov Serafım shirkeýinde (Bógenbaı batyr dańǵyly, 8).
Sýǵa túsý oryndary 18 qańtar kúni saǵat 20:00-den 19 qańtar kúni saǵat 02:00-ge deıin ashyq bolady. Bul ýaqytta sý mańyna jaryq ornatylady.
Jappaı shomylý 19 qańtar kúni tańǵy saǵat 08:00-den keshki 23:00-ge deıin jalǵasady.
Qaýipsizdikti qamtamasyz etý maqsatynda Tótenshe jaǵdaılar departamentiniń sýdan qutqarý qyzmeti jáne Astana qalasy Polıtsııa departamentiniń qyzmetkerleri jumys isteıdi. Sonymen qatar sýǵa túsý oryndarynda jedel járdem brıgadalary kezekshilik etedi.
Qala turǵyndary men qonaqtary sýǵa túsý kezinde qaýipsizdik erejelerin saqtaýy jáne aýa raıy jaǵdaıyn eskerýi shart.
Belgilengen shomylý oryndarynda kelesi talaptardy oryndaý qajet: oıyq mańynda bir ýaqytta 3 adamnan artyq bolmaýy tıis; sýǵa tek qutqarýshylar men medıtsına qyzmetkerleriniń baqylaýymen kirýge ruqsat etiledi. Sýǵa túser aldynda deneni qyzdyrý jattyǵýlaryn jasaý, rásimnen keıin súlgimen súrtinip, jyly kıim kıip, ystyq shaı ishý usynylady. Eger sýǵa túsken kezde densaýlyǵyńyz nasharlasa, dereý kezekshi dárigerge habarlasý qajet.
Qutqarýshylar kelesi eskertýlerdi qaperge salady:
– Jabdyqtalmaǵan jerlerde qutqarýshylar men dárigerlerdiń qatysýynsyz sýǵa túsýge tyıym salynady.
– Balalardy qaraýsyz qaldyrýǵa bolmaıdy. Balanyń júze alýy sýyq sý men strestik jaǵdaıdyń keri áserinen qorǵaı almaıdy.
– Muzdy sýǵa sekirip túsý qaýipti, jaraqat alý múmkindigi joǵary.
– Іshimdik ishken kúıde sýǵa túsýge bolmaıdy, sebebi bul túrli qaýipti jaǵdaılarǵa ákelýi yqtımal.
Eske salsaq, buǵan deıin Qaraǵandyda muzdy sýǵa shomylý kezinde 21 arnaıy shomylý orny TJD baqylaýynda bolatynyn jazǵan edik.