Astanada qaı jerde masa ýlap jatqanyn mobıldi qosymshadan bilýge bolady
NUR-SULTAN. QazAqparat - Nur-Sultan qalasynda shybyn-shirkeıge, masaǵa qarsy dezınsektsııa jumystary júrip jatyr, dep habarlaıdy QazAqparat ákimdiktiń resmı saıtyna silteme jasap.
Mamandar qalanyń saıabaqtaryn, bos aýmaqtardy arnaıy eritindimen óńdedi.
Óńdeý jumysy shybyn-shirkeı men masanyń sanyn azaıtýmen ǵana shekteledi.
Onyń barysynda usaq jándikter joıylyp ketpeıdi.
«Nur-Sultan qalasynyń qorshaǵan ortany qorǵaý jáne tabıǵat paıdalaný basqarmasy shybyn-shirkeıge qarsy dezınsektsııa jumysyn júrgizip jatyr. 26 sáýirde qalanyń syrtyndaǵy sý qoımalaryn óńdeýdi bastaǵanbyz. Qazirgi ýaqytta qalanyń ishki aýmaqtaryn óńdeýge kiristik. Bul jumysqa 150-den asa maman, 4 dezmashına jumyldyryldy. Sol sııaqty termogeneratormen jumys isteıtin 4 brıgada bolady. Qalamyzdy 150 ýchaskege bóldik. Osy 150 ýchaskede 10 brıgada jumys isteıtin bolady. Árqaısysynda 9-10 adam bar. Bıyl E-Knot qosymshasymen qala turǵyndaryn eskertip otyramyz. Sol sebepti osy qosymshany qala turǵyndary telefonyna júktep alǵany jón. Osy arqyly qalanyń qaı tusy qaı ýaqytta óńdeletini eskertiledi», - dedi atalmysh basqarma basshysynyń orynbasary Janar Beskempirova.
