Astanada qaı jerde konkı tebýge bolady
ASTANA. QazAqparat - Elordada muz aıdyndaryn quıý men hokkeı alańdaryn ornatý jumystary júrgizilip jatyr, dep habarlaıdy QazAqparat Astana ákimdiginiń medıa ortalyǵyna silteme jasap.
«Saryarqa» aýdanynyń Saryarqa dańǵylynda, Qosshyǵululy kóshesinde, Kırpıchnyı eldi mekeni men «Óndiris», «Kóktal-1», «Kóktal-2» turǵyn úı alqaptarynda muz aıdyndary men hokkeı alańdary ornalasatyn bolady. Esil ózeniniń jaǵalaýynda eki muz aıdyny uıymdastyrylmaq. Ákimdik janyndaǵy qalalyq alańda konkıdi jalǵa beretin pýnkti bar qoǵamdyq muz aıdyny ashylady jáne qysqy ýaqytta Qajymuqan Muńaıtpasov atyndaǵy fýtbol alańy muz arenasyna aınalady.
«Almaty» aýdanynda № 5, 27, 30, 31, 32, 57 mektepterdiń aýmaǵynda, sondaı-aq, «Jeleznodorojnyı» turǵyn úı alqabyndaǵy №65668 áskerı bólimniń aýmaǵyna hokkeı alańdary ornatylatyn bolady.
Sonymen qatar, 25 jeltoqsanda Aqbulaq ózeninde, 26 jeltoqsanda - Jeruıyq saıabaǵynda muz aıdyndarynyń ashylý saltanaty ótedi.
«Esil» aýdanynda «Kerýen» OSO men «Severnoe sııanıe» TK arasynda jáne «Prıgorodnyı» turǵyn úı alabynda jáne № 24, 69 (Ilınka), 45, 71, 76 mektepterdiń aýmaǵynda muz aıdyndary ornalasady.
27 jeltoqsannan bastap, Prezıdent saıabaǵyndaǵy qardan jasalǵan tóbeshikterden syrǵanaı alasyz. Budan bólek, «Jastar» saraıy aýmaǵynda da muz aıdyny men syrǵanaq tóbeshikteri paıda bolady.
Barlyq saıabaqtarda konkıdi jalǵa beretin pýnkter men tamaqtaný oryndary uıymdastyrylady.
