Astanada qaýipsizdik sharalary kúsheıtildi
ASTANA. KAZINFORM – stana qalasynda Polıtsııa departamenti prokýratýranyń úılestirýimen bir aılyq esirtki qylmystaryna qarsy is-sharalardy bastady. Onyń aıasynda tártip saqshylary birqatar jedel aldyn alý jumysyn júrgizip jatyr.
Polıtseıler elordada qoǵamdyq tártipti saqtaý, quqyq buzýshylyqtyń aldyn alý jáne qylmystardy boldyrmaý maqsatynda «Quqyqtyq tártip» jedel-aldyn alý is-sharasyn ótkizip jatyr. Sondaı-aq «Ýchaske» atty shara júzege asyrylýda. Onyń maqsaty — qoǵamdyq qaýipsizdikti arttyrý jáne polıtsııa men halyq arasyndaǵy senimdi nyǵaıtý.
Polıtsııa departamentiniń jergilikti polıtsııa qyzmeti basqarmasynyń bastyǵy, polkovnık Erjan Ádilbekovtiń aıtýynsha, tekserister kezinde eseptegi tulǵalar, jalǵa beriletin páterler, turǵyn alaptar men ańshylyq qarýy bar azamattar qaralady. Sonymen birge jol qaýipsizdigin qadaǵalaýǵa ulttyq ulan áskerı qyzmetshileri de jumyldyrylǵan. Olar moped pen samokat mingen jaıaý júrginshilerge, sondaı-aq kólik júrgizýshileriniń zańsyz turaqqa qoıý derekterine nazar aýdarady.
— Búgingi is-sharaǵa shamamen 500-ge jýyq ishki ister organdary qyzmetkeri tartyldy. Túngi saǵat 01:00–ge deıin tekserister jalǵasady. Saıabaqtar men skverler sııaqty qoǵamdyq oryndar da nazarda bolady. Sonymen qatar samokat pen mopedti zańsyz júrgizý, avtokólikterdegi qatty dybys shyǵaratyn glýshıtelder, jol erejelerin buzý faktileri anyqtalady. Ásirese, jolda júrý erejesin saqtamaıtyn jaıaý júrginshilerge basa kóńil bólinedi, — dedi ol.
Onyń aıtýynsha, «Quqyqtyq tártip» is-sharasy toqsan saıyn keminde eki ret ótkiziledi.
Spıker samokat júrgizýshileriniń jıi jasaıtyn quqyq buzýshylyqtaryn da atady: — eki adam otyryp júrý; — júk tasý; — joldy belgilenbegen jerden kesip ótý; — baǵdarshamda túspeı ótý; — samokattardy jaıaý júrginshiler trotýaryna tastap ketý.
Mundaı jaǵdaıda samokattar aıypturaqqa qoıylady, al erejeni buzǵandar jaýapkershilikke tartylady. Ákimshilik polıtsııanyń málimetinshe, sońǵy bir aıda kıksherıng kompanııalaryna qatysty 30-dan astam ákimshilik is qozǵalǵan.
Bul sharaǵa «Astana Jastary» eriktileri de belsene qatysyp jatyr.
— Jasóspirimder óz erkimen volonter bolady, mundaı is-sharalarǵa qyzyǵýshylyqpen qatysady. Olar qoǵamǵa paıdasyn tıgizgisi keledi, — deıdi eriktilerdiń úılestirýshisi Indıra Maremova.
Onyń aıtýynsha, polıtsııa ár eki aı saıyn belsendi eriktilerdi marapattap, alǵys hat pen usynym hat tabystaıdy. Bul qujattar jastarǵa sheteldik joǵary oqý oryndaryna túsýge septigin tıgizedi.
Aıta ketelik «Qarasora-2025» operatsııasynyń úsh aıynda 677 esirtki qylmysy anyqtaldy.