Astanada qaýipsizdik pen azamattyq qorǵanys salasyndaǵy ІІ halyqaralyq kórme ashyldy (FOTO)
ASTANA. QazAqparat - Astanada qaýipsizdik jáne azamattyq qorǵanys salasyndaǵy ozyq tehnıkalardy tanystyratyn «Kazakhstan Security Systems-2015» ІІ halyqaralyq kórme ashyldy.
Uıymdastyrýshylardyń aıtýynsha, elimizde jyl saıyn, tipti, aı saıyn aýqymdy is-sharalar, ár túrli deńgeıdegi kezdesýler, halyqaralyq deńgeıdegi jıyndar ótetini anyq. Mine, sondaı aýqymdy sharalardyń qaýipsizdigin qamtý, azamattardyń amandyǵyn baqylaý, qoǵamdyq tártiptiń buzylýyna aparatyn jaıttardyń aldyn alý, tabıǵı jáne adamı faktor sebep bolatyn tótenshe jaǵdaılardyń aldyn alý jáne saldarlaryn joıý úlken jaýapkershilikti talap etedi. Búgingi kórme dál osy baǵytta qandaı jetistikter bar, qandaı ǵylymı-tehnıkalyq jańalyqtar bolyp jatyr degen máselelerdi qamtıdy.
Kórmege Qazaqstan, Germanııa, Italııa, Reseı, AQSh, Qytaı, Shvetsııa, Shveıtsarııa elderiniń zaýyttary óndirgen 100-ge jýyq brendti ónimder qoıylǵan. Mysaly, Frantsýz eliniń kompanııalary órtke qarsy qural-jabdyqtar men órt shyǵa qalǵanda belgi beretin detektorlardy, robottehnıkalar men oq-ot ótpeıtin kólikterin kórmege qoıyp, úlken nazarǵa ıe bolyp jatyr. Tipti, kórme aıasynda Frantsııa polıtsııasynyń arnaıy bólimi men Frantsııadaǵy táýekelderdi basqarý ortalyńynyń sarapshylary arnaıy semınarlar ótkizýge nıettenip kelgen.
Aıta keteıik, kórmeni QR Іshki ister mınıstrligi, QR Ulttyq qaýipsizdik komıteti men Astana qalasynyń ákimdigi uıymdastyryp otyr.
