Astanada «Qaýipsiz qala» máselesin sheshýge arnalǵan startap jobasy bastaldy
«Qaýipsiz qala» taqyrybyn tańdaǵan startap jobasy tómendegi baǵyttar boıynsha ótýde:
Qoǵamdyq tártipti baqylaý;
Órtke qarsy júıeler qaýipsizdigi;
Jol qaýipsizdigi;
Turmystyq jaǵdaı qaýipsizdigi;
Sý toǵandaryndaǵy demalys;
Tótenshe jaǵdaılar.
Shara aıasynda isin jańadan bastaǵandarǵa sarapshylar men bıznesmender óz tájirıbelerimen qatar tabysqa jetý qupııalarymen bólisedi.
Beıresmı shara barysynda árbir qatysýshy óz bıznes-ıdeıasynyń naqty baǵasyn alyp, odan ári áriptestik arqyly óz jobasynyń mańyzdy aspektilerin talqylaı alady.
«Mundaı jobalar kez kelgen adamnyń qala úshin mańyzdy sanalatyn jáne qalaǵa arnalǵan óz jobasyn dáleldep kórsetýine múmkindik beredi. Baıqaý jeńimpazdaryna óz jobalaryn qarjylandyrý, tegin baǵalaý jasaý, jınaqtaý jáne ınvestıtsııa tartý úshin kórsetilim jasaý múmkindigi beriledi», - dedi «Astana Innovations» AQ-nyń Basqarma tóraǵasy Oljas Sartaev.
Aıta keteıik, Startup Weekend - bul qatysýshylardyń óz startaptaryn úsh kún ishinde iske qosýyna múmkindik beretin halyqaralyq ádis. Bul ádis boıynsha qatysýshylar óz komandasyn 54 saǵat aralyǵynda jasaqtap, joba ıdeıalaryn talqylap, qajetti bilim alýlaryna jáne óz jobasyn jasaýǵa statıstıkalyq derekterge qol jetkizýine múmkindik beriledi. Úshinshi kúni jobalardy tanystyrý sharasy ótedi.
Aıta keteıik, atalǵan startap ádisin álemniń 150-den astam eli óz tájirıbelerinde qoldanady.
«Astana qazirdiń ózinde ınnovatsıalyq jobalardy jasaý boıynsha kóptegen jańa ıdeıalardyń toǵysqan ortalyǵyna aınaldy. Kapıtalǵa, talanttylar men naryqqa básekelestik deńgeıi joǵary qazirgideı kezeńde ekonomıkany túbegeıli qaıta qurylymdaý asa qajet. Budan bólek, az ǵana jetistik arqyly bızneste úlken jeńisterge jetýge bolatyn naryqta áli ıgerilmegen tyń salalar bar» - dedi sharany uıymdastyrýshy, ınnovatsııalyq ekojúıelerdi damytý ortalyǵynyń jetekshisi Nursultan Qaldybaev.
Úsh kúnge sozylatyn sharany Astana qalasynyń ákimdiginiń qoldaýymen «Astana Innovations» AQ uıymdastyrýda.
