Astanada qatty jelden kran qulady

NUR-SULTAN. QazAqparat – Elordada qatty jel saldarynan munara krany qulady, dep habarlaıdy QazAqparat tilshisi QR Tótenshe jaǵdaılar mınıstrligi ónerkásip qaýipsizdigi komıtetiniń baspasóz qyzmetine silteme jasap.

«Búgin Syǵanaq jáne Turan kósheleriniń qıylysynda munara krany qulady. Aldyn ala málimet boıynsha kran qatty jelden qulap ketken. Qazir tótenshe jaǵdaıdyń mán-jaıy anyqtalyp jatyr. Oqıǵa ornyna QR TJM ónerkásip qaýipsizdigi komıtetiniń Nur-Sultan qalasy boıynsha departamentiniń qyzmetkerleri shyqty», - delingen komıtet taratqan habarlamada.

Atalǵan vedomstvonyń aqparatyna saı zardap shekkender joq.

Málim bolǵandaı, qulaǵan kran qoldanylmaı, qańtarylyp turǵan.

Eske salaıyq, bıyl aqpan aıynda osyǵan uqsas jaǵdaı Turan dańǵyly boıynda boldy. Krannyń qulaýynan jumysshy kóz jumdy.

Sondaı-aq bıylǵy sáýirde turǵyn úıdiń altynshy qabatyna kran qulaǵan edi.

Odan bólek, mamyrda kran kabeli úzilip, qurylysshy qaza tapty.