Astanada qatty jelden Mega SilkWay saýda ortalyǵynyń qorshaýy áıeldiń ústine qulady
Astanada Mega SilkWay saýda ortalyǵy janynda qatty jeldiń ekpininen qorshaý qulady. Saldarynan bir áıel №2 kópsalaly aýrýhanaǵa jetkizildi. Bul týraly Astana qalasy Esil aýdany ákimdiginiń baspasóz qyzmeti aıtty, dep habarlaıdy Kazinform agenttigi.
Oqıǵa vıdeosy Astanovka98 telegram-arnasynda jarııalanǵan edi.
Aýdan ákimdiginiń baspasóz qyzmeti bannerdi Mega SilkWay saýda ortalyǵy ornatqanyn habarlady.
«Qatty jel saldarynan banner men onyń plastıkalyq jaqtaýy ushyp ketken. Nátıjesinde 1954 jyly týǵan azamat jaraqat aldy, onyń keýde jáne shyntaq býyndary kógergen. Turǵyn №2 qalalyq kópsalaly aýrýhanaǵa jetkizildi. Qazirgi ýaqytta qorshaýǵa ilingen bannerler kesilip, alynyp tastaldy, óıtkeni olar isinip, qorshaýdy qulatqan», - dep habarlady vedomstvo.
Aýdan ákimdigi astanalyqtardy jarnamalyq qurylymdarǵa, afıshalarǵa jaqyn jerde abaı bolýǵa jáne múmkindiginshe úıde bolýǵa shaqyrdy.
Sondaı-aq, áleýmettik jelilerde qatty jelden aýdarylǵan kólikter men qulaǵan qasbetterdiń fotosýretteri jarııalanýda.
Aıta keteıik, Qazaqstannyń basym bóliginde aýa raıyna baılanysty eskertý jarııalandy.
